ចង់ដឹងថាមនុស្សមានចរិតបែបណា សូមមើលរឿងទាំង៣នេះដើម្បីមានឥរិយាបថត្រឹមត្រូវ។ ក្នុងជីវិត ការយល់ចិត្តមនុស្សគឺជាសិល្បៈមួយ។ ដើម្បីវាយតម្លៃថាតើមនុស្សម្នាក់គួរឲ្យទុកចិត្ត និងស្មោះត្រង់ឬអត់ អ្នកអាចមើលទិដ្ឋភាពបីដូចខាងក្រោម៖
១.របៀបដែលពួកគេប្រព្រឹត្តលើអ្នកទន់ខ្សោយ៖ បុគ្គលដែលមានចិត្តមេត្តាពិតនឹងបង្ហាញវាតាមរបៀបដែលពួកគេប្រព្រឹត្តចំពោះមនុស្សដែលមានឋានៈទាបជាងខ្លួន ដូចជាអ្នកបម្រើ អ្នកក្រ ឬ កុមារជាដើម។ ប្រសិនបើពួកគេបង្ហាញការគោរព សេចក្តីសប្បុរស និងការមិនរើសអើង នោះគឺជាសញ្ញានៃចិត្តដ៏ជ្រាលជ្រៅ។ ផ្ទុយទៅវិញ បើគេមើលងាយ ឬ បង្ហាញភាពក្រអឺតក្រទម ចិត្តរបស់បុគ្គលនោះច្រើនតែរាក់ៗ ដោយគ្រាន់តែដឹងពីរបៀបស្វែងរកផលប្រយោជន៍ផ្ទាល់ខ្លួនប៉ុណ្ណោះ។
មនុស្សម្នាក់ដែលតែងតែញញឹម និងអរគុណអ្នករត់តុ ឬ មានឆន្ទៈជួយជនចម្លែកដែលខ្វះខាត ជាធម្មតាមានការយល់ចិត្ត និងភាពស្មោះត្រង់ អាចអោយអ្នករាប់អាន់ពួកគេដោយចិត្តស្មោះបាន។
២.អាកប្បកិរិយានៅពេលប្រឈមមុខនឹងការបរាជ័យ៖ ជីវិតមិនតែងតែរលូនរហូតនោះទេ។ ពេលជួបនឹងការលំបាកឬបរាជ័យ របៀបដែលមនុស្សមានប្រតិកម្មនឹងបង្ហាញពីលក្ខណៈពិតរបស់ខ្លួន។ បុគ្គលដែលចេះគិតនឹងស្ងប់ស្ងាត់ រៀនពីកំហុស ហើយមិនបន្ទោសអ្នកដទៃ។ ទន្ទឹមនឹងនេះ មនុស្សចរិតមិនល្អងាយនឹងឆាប់ខឹង មិនទទួលខុសត្រូវ ឬ រកលេសដើម្បីគេចវេសចេញពីទំនួលខុសត្រូវ។
សូមកត់សម្គាល់ថាតើពួកគេស្វែងរកវិធីដោយអត់ធ្មត់ដើម្បីជម្នះភាពលំបាក ឬ គ្រាន់តែយំ ហើយបោះបង់។
៣.សកម្មភាពខ្លាំងជាងពាក្យសម្តី៖ ពាក្យផ្អែមល្ហែមងាយនិយាយ ប៉ុន្តែសកម្មភាពគឺជាការវាស់ស្ទង់ចិត្តពិតរបស់មនុស្ស។ មនុស្សដែលគួរឱ្យទុកចិត្តនឹងរក្សាការសន្យារបស់ខ្លួន ធ្វើអ្វីដែលគេនិយាយថាគេនឹងធ្វើ ហើយមិនធ្វើការសន្យាដែលគេមិនអាចរក្សាបាន។ ផ្ទុយទៅវិញ មនុស្សដែលនិយាយតែមិនធ្វើ ច្រើនតែខ្វះភាពស្មោះត្រង់ និងការទទួលខុសត្រូវ។ កុំឆាប់ជឿលើការសន្យាធំៗ ចាំមើលថាតើពួកគេពិតជាមានវិធានការណ៍ដើម្បីបញ្ជាក់ដែរឬទេ?
សេចក្តីសន្និដ្ឋាន៖ ដើម្បីយល់ពីចិត្តមនុស្ស មិនចាំបាច់ស្មុគស្មាញពេកទេ។ ដោយគ្រាន់តែសង្កេតមើលពីរបៀបដែលពួកគេប្រព្រឹត្តចំពោះអ្នកដទៃ អាកប្បកិរិយារបស់ពួកគេចំពោះការលំបាក និងភាពស៊ីសង្វាក់គ្នារវាងពាក្យសម្ដី និងសកម្មភាពរបស់ពួកគេ នោះអ្នកនឹងយល់បានខ្លះពីធម្មជាតិរបស់ពួកគេ៕