សមាគមអ្នកវិទ្យាសាស្រ្ដវេជ្ជសាស្រ្ដកម្ពុជា សូមអំពាវនាវដល់ សប្បុរសជន សមាជិក សមាជិកាទាំងអស់ដែលមានចំណាប់អារម្មណ៍ ជាសទ្ធាជ្រះថ្លាក្នុងការបរិច្ចាកជាថ្នាំពេទ្យ (ដូចមានរាយក្នុងបញ្ជីខាងក្រោម ឬច្រើនជាងនេះ) ជាថវិការ ឬជាសម្ភារៈផ្សេងៗទុកជូនដល់សិស្សានុសិស្ស និងប្រជាជនដែលខ្វះខាតនៅទីតាំងសាលាដូង ភ្នំគិរីរម្យតាមរយៈសមាគម ក្នុងកម្មវិធីចុះពិនិត្យ ព្យាបាល និងអប់រំសុខភាពប្រជាជន និងសិស្សានុសិស្ស។
គួរបញ្ជាក់ផងដែរថា សមាគម ស.វ.វ.ក បានសហការជាមួយស្ថាបនិកសាលាដូង លោក អ៊ុក វណ្ណដេ និងមានការចូលរួម ក៏ដូចជាការអនុញ្ញាតិពីឯកឧត្ដមអភិបាលខេត្តកំពង់ស្ពឺ និងមន្រ្ដីមូលដ្ឋានផងដែរ។
កម្មវិធីនេះដែលមានគោលបំណងជារួមគឺ៖
1/ ពិនិត្យ និងព្យាបាលជំងឺជូនប្រជាជនក្រីក្រលើភ្នំគិរីរម្យ ដែលមាន4ភូមិ ឬប្រហែល 210គ្រួសារ។
2/ អប់រំសុខភាពប្រជាជន៖
+វិធីការពារពីការឆ្លងជំងឺកូវីដ១៩ ជាសារសំខាន់ដែលសមាគមអ្នកវិទ្យាសាស្រ្ដវេជ្ជសាស្រ្ដកម្ពុជាត្រូវពាំនាំដល់ប្រជាជន ក៏ដូចជាផ្សព្វផ្សាយបន្ដពីក្រសួងសុខាភិបាល និងរាជរដ្ឋាភិបាលកម្ពុជា ដើម្បីជាផ្នែកមួយនៃការទប់ស្កាត់ និងបង្ការកុំអោយមានរលកទី២។
+ វិធីសាស្រ្ដអនាម័យដៃ មិនថាកន្លែងឆ្លង ឬមិនឆ្លងឡើយ ប្រជាជនយើងត្រូវតែចេះ និងអនុវត្តន៍វិធីលាងដៃអោយបានខ្ជាប់ខ្ចួន។
+ សង្គ្រោះបន្ទាន់អំពីពស់ចឹក។
+ និងជំងឺប្រចាំកាយផ្សេងៗទៀត។
ដូច្នេះសូមជម្រាបជូនសារជាថ្មីដល់សប្បុរសជននានាដែលមានចិត្តមេត្តា និងសទ្ធាជ្រះថ្លាក្នុងការឧបត្ថម្ភគាំទ្រកម្មវិធីនេះ។
សមាគមស.វ.វ.ក សូមអរគុណទុកជាមុននូវទឹកចិត្តដ៏ថ្លៃថ្លានេះ៕
🙏🙏🙏🙏
