ការប្រច័ណ្ឌក៏មានដែនកំណត់របស់វា រីឯការអត់ធ្មត់ក៏ដូចគ្នា ហើយបើស្រលាញ់ប៉ះអ្នកពូកែប្រច័ណ្ឌដូចគ្នា គឺធានាដឹងតែមិនបានយូរឡើយ។ ដូចគេនិយាយថា បើម្នាក់ភ្លើង ម្នាក់ទឹក នោះទើបអាចរស់នៅចុះសម្រុង ហើយអាចបង្កើនទ្រព្យ បង្កើនលាភ ក្លាយជាសុភមង្គលទៅថ្ងៃមុខបាន។
មកក្នុងអត្ថបទហោរាសាស្រ្តនេះ យើងបង្ហាញម្ចាស់ឆ្នាំទាំង ៣ សំដៅទៅមនុស្សស្រីជាពិសេស គឺពូកែប្រច័ណ្ឌណាស់ តែបើរកប៉ះមនុស្សប្រុសរាងពូកែអត់ធ្មត់ ចិត្តធ្ងន់តែបន្តិច នោះនឹងអាចរស់នៅជាមួយគ្នាបានយូរ ហើយក៏អាចកសាងអនាគតភ្លឺស្វាងឆាប់រហ័សដែរ៖
អ្នកកើតឆ្នាំថោះ – ទន្សាយ
ការប្រច័ណ្ឌជាគ្រឿងទេស ដែលមិនអាចខ្វះបានក្នុងសេចក្តីស្នេហា តែវាក៏គួរមានពេលវេលារបស់វាដែរ។ យ៉ាងណាអ្នកកើតឆ្នាំថោះ គឺជាមនុស្សស្រីដែលរមែងមានចរិតកាចឆ្នាស់ ពេលខ្លះមិនសូវចេះមាត់ក តែភាពស្ងាត់ស្ងៀមនោះ បង្កប់ទៅដោយការគិត ការខឹង ការអន់ចិត្តជាច្រើនរាប់មិនអស់។
គ្រប់ទង្វើរបស់មនុស្សប្រុសដែលនាងស្រលាញ់ នាងមើលគ្រប់ជ្រុងជ្រោយ ហើយបើបានស្រលាញ់នរណាម្នាក់ហើយ ដាក់ចិត្តដាក់បេះដូងទៅលើគេសឹងតែទាំងស្រុង ជាហេតុនាំឲ្យពេលខ្លះ នាងឆាប់ប៉ះទង្គិចផ្លូវអារម្មណ៍លឿន។
រីឯបុរសដែលបាននាងជាគូ ក៏រាប់ថាសំណាងម្យ៉ាងដែរ ដ្បិតបើប្រច័ណ្ឌច្រើន តែនាងក៏ស្រលាញ់អ្នកខ្លះ។ បើអ្នកជាបុរស ឲ្យតែមានចិត្តធ្ងន់បន្តិច មានការអត់ធ្មត់នឹងពាក្យសម្តីរបស់នាងបន្តិច នោះនឹងអាចចុះសម្រុង ហើយដូចសំណាងរត់ចូលសំណាង បើនិយាយអំពីផ្នែកទ្រព្យពេលទៅមុខ ជាមួយមនុស្សស្រីឆ្នាំថោះ។
អ្នកកើតឆ្នាំខាល – ខ្លា
ចរិតម្ចាស់ឆ្នាំខាល ឆាប់ឆេវឆាវបន្តិច តែក៏ឆាប់បាត់ទៅវិញដែរ។ បើជាមនុស្សស្រីកើតឆ្នាំខាល កាលបើបានស្រលាញ់បុរសណាហើយ គឺរមែងតាមគេស្អិត ព្រោះខ្លាចដៃគូមានចិត្តពីរ មានការបែកចិត្តទៅរកអ្នកផ្សេង។
ដូច្នេះហើយទៅណាមួយជំហាន ក៏នាងចង់ដឹងដែរ នាងចង់ទៅជាមួយប្រសិនជាអាច ហើយព្យាយាមសម្របខ្លួន ឲ្យតែបាននៅក្បែរអ្នក។ យ៉ាងណាទង្វើបែបនេះ ជួនកាលក៏មើលទៅវារាងតឹងតែងបន្តិចដែរ សម្រាប់ដៃគូជាបុរស ពេលខ្លះនាំឲ្យមានសម្ពាធ តែបើបានបុរសជាដៃគូ គេរាងចិត្តធ្ងន់ គេអំណត់ខ្ពស់ នោះនឹងជារឿងល្អទៅវិញ នាពេលទៅមុខ។
អ្នកកើតឆ្នាំម្សាញ់ – ពស់
ម្ចាស់ឆ្នាំម្សាញ់ ភេទស្រី ជាមនុស្សមានទំនុកចិត្ត មានភាពឯករាជ្យ តែរឿងប្រច័ណ្ឌក្នុងអត្ថន័យស្នេហានេះមួយ គឺកាត់អត់បានឡើយ។ ធាតុផ្សំនេះ ជួនខ្លះវាកើតឡើងជ្រុលក្នុងទំហំចិត្ត ទើបនាំឲ្យនាង ឆាប់ខឹង ឆាប់អន់ចិត្ត ទាមទារឲ្យបុរសជាដៃគូតាមលួងជាញឹកញយ។
ពេលខ្លះក៏មានចរិតដូចជាទារកម្តងម្កាលដែរ ជាហេតុនាំឲ្យអារម្មណ៍ពាក់កណ្តាលសម្រាប់បុរស អាចធុញទ្រាន់ ពាក់កណ្តាលទៀត អាចគួរឲ្យស្រលាញ់។ បើប៉ះបុរសមានទំនួលខុសត្រូវ បុរសយល់ច្បាស់ពីដៃគូខ្លួន ថានាងពូកែប្រច័ណ្ឌបន្តិចមែន តែមកពីស្រលាញ់ នោះនឹងជារឿងល្អទៅវិញ ដែលអាចនាំឲ្យអ្នកទាំងពីរ អាចរស់នៅចុះសម្រុង រយៈពេលយូរនឹងគ្នាទៅថ្ងៃមុខ៕
ប្រភព៖ បរទេស | ប្រែសម្រួល៖ ក្នុងស្រុក