ខ្មោចនាវាចម្បាំង១គ្រឿង និងគ្រាប់យុទ្ធភ័ណមិនទាន់ផ្ទុះ ត្រូវបានគេរកឃើញនៅស្រុកស្រីសន្ធរ ខណៈអភិបាលខេត្តកំពង់ចាម ស្នើឲ្យពលរដ្ឋមានការប្រុងប្រយ័ត្ន
កំពង់ចាម៖ ខ្មោចនាវាចម្បាំង១គ្រឿង រួមជាមួយគ្រាប់យុទ្ធភ័ណមិនទាន់ផ្ទុះ ចំនួន៣ប្រភេទ ត្រូវបានគេរកឃើញនៅក្នុងទឹកទន្លេមេគង្គ ស្ថិតក្នុងភូមិវាល ឃុំមានជ័យ ស្រុកស្រីសន្ធរ ខេត្តកំពង់ចាម ដែលគេសង្ស័យថាជាសំណល់ពីសម័យសង្គ្រាម ។ បន្ទាប់ពីទទួលបានសេចក្ដីរាយការណ៍ពីអាជ្ញាធរមូលដ្ឋាន កាលព្រឹកថ្ងៃទី១២ ខែសីហា ឆ្នាំ២០២០ ឯកឧត្ដម អ៊ុន ចាន់ដា អភិបាលខេត្តកំពង់ចាម អមដំណើរដោយអភិបាលរងខេត្ត និងមន្ត្រីពាក់ព័ន្ធ បានអញ្ជើញចុះពិនិត្យទីតាំងខ្មោចនាវាលិចទឹកខាងលើ ដើម្បីរៀបចំឲ្យមានកម្លាំងសមត្ថកិច្ចប្រចាំការនៅតំបន់នោះ រហូតគ្រាប់យុទ្ធភ័ណទាំងអស់ ត្រូវបានយកចេញដោយសុវត្ថិភាព។ ជាមួយគ្នានោះ ឯកឧត្តមអភិបាលខេត្ត ក៏បានអំពាវនាវដល់បងប្អូនប្រជាពលរដ្ឋ កុំឲ្យចូលទៅធ្វើការនេសាទក្នុងតំបន់ហាមឃាត់នោះជាដាច់ខាត ព្រោះវាអាចបង្កឲ្យមានគ្រោះថ្នាក់ ដល់អាយុជីវិតបានគ្រប់ពេល ដូច្នេះត្រូវរង់ចាំរហូតមន្ត្រីជំនាញ មកធ្វើការបោសសម្អាត…
