ការអ៊ុតសក់ ផាត់ពណ៌ កម្ដៅថ្ងៃ និងការប្រើម៉ាស៊ីនផ្លុំសក់រាល់ថ្ងៃ ធ្វើឱ្យសក់ស្ងួត រឹង និងបែកចុង។
សូមជ្រាបជាមុនថា សក់ដែលខូចខ្លាំងមិនអាច «ជា» ទាំងស្រុងដូចដើមវិញទេ។ ប៉ុន្តែរូបមន្តបំប៉នខាងក្រោមអាចជួយឱ្យសក់មានសំណើម ទន់ រលោង និងមិនសូវបាក់។
គ្រឿងផ្សំទាំងអស់រកបានងាយក្នុងផ្ទះបាយ ឬផ្សារ។ ក្នុងចំណោមនោះ ប្រេងដូងមានការស្រាវជ្រាវគាំទ្រច្បាស់ជាងគេ។ ចំណែករូបមន្តផ្សេងទៀត ភាគច្រើនផ្អែកលើបទពិសោធន៍របស់អ្នកប្រើ ហើយការសិក្សានៅមានតិច។
១. ប្រេងដូង
ប្រេងដូងអាចជ្រាបចូលក្នុងសរសៃសក់បានល្អជាងប្រេងផ្សេង។ ការស្រាវជ្រាវបង្ហាញថា វាជួយកុំឱ្យសក់បាត់ប្រូតេអ៊ីន ទាំងពេលលាបមុនកក់ និងក្រោយកក់។
គ្រឿងផ្សំ៖ ប្រេងដូង ២ ស្លាបព្រាបាយ
របៀបធ្វើ៖ កំដៅប្រេងឱ្យឧណ្ហៗ (កុំឱ្យក្តៅ)។ បាញ់ទឹកឱ្យសក់សើម រួចលាបប្រេងឱ្យសព្វ។ លាបច្រើនត្រង់ចុងសក់ ហើយតិចត្រង់ជិតស្បែកក្បាល។ ពាក់មួកងូតទឹក ទុក ១ ទៅ ២ ម៉ោង។ លាងជាមួយទឹកឧណ្ហៗ រួចកក់សក់ធម្មតា។
២. ប្រេងអូលីវ
ប្រេងអូលីវស្រោបសរសៃសក់ ជួយកុំឱ្យសក់បាត់សំណើម។ សក់ប្រែជាទន់ រលោង មិនសូវប៉ោង និងមិនងាយបាក់។ វាមិនធ្វើឱ្យសក់ដុះលឿនទេ។
គ្រឿងផ្សំ៖ ប្រេងអូលីវសុទ្ធ ពីរបីតំណក់
របៀបធ្វើ៖ ត្រដុសប្រេងលើបាតដៃ រួចលាបលើសក់សើម ចាប់ពីកណ្ដាលសក់ដល់ចុង។ ប្រើតិចៗ ព្រោះប្រើច្រើនពេកធ្វើឱ្យសក់ស្អិត។
រូបមន្តនេះសមនឹងសក់ក្រាស់ សក់រួញ ឬសក់ស្ងួត។ អ្នកមានសក់ស្តើង ឬសក់ងាយចេញប្រេង មិនគួរប្រើទេ។ កុំលាបច្រើនលើស្បែកក្បាល។
៣. ផ្លែប័រ
ផ្លែប័រមានប្រេងធម្មជាតិ និងអាស៊ីតខ្លាញ់ល្អ ដែលជួយផ្តល់សំណើមដល់សក់ស្ងួត។ ការសិក្សាផ្ទាល់លើសក់នៅមានតិច ប៉ុន្តែមនុស្សជាច្រើនប្រើហើយពេញចិត្ត។
គ្រឿងផ្សំ៖ ផ្លែប័រទុំ ១ ផ្លែ និងប្រេងដូង ២ ទៅ ៣ ស្លាបព្រាបាយ
របៀបធ្វើ៖ កិនផ្លែប័រឱ្យមអិត លាយជាមួយប្រេងដូង។ លាបលើសក់ស្ងួត ទុក ២០ ទៅ ៣០ នាទី។ លាងចេញ រួចកក់សក់ធម្មតា។ បើសក់នៅស្អិត កក់ម្តងទៀត។
៤. ស៊ុត
ស៊ុតក្រហមមានវីតាមីន A វីតាមីន E ប៊ីអូទីន និងហ្វូឡាត។ សារធាតុទាំងនេះអាចជួយឱ្យសក់ធន់នឹងការខូចខាតបានល្អជាងមុន។
គ្រឿងផ្សំ៖ ស៊ុត ១ គ្រាប់ ផ្លែប័រកន្លះផ្លែ និងប្រេងអូលីវ ១ ស្លាបព្រាកាហ្វេ
របៀបធ្វើ៖ លាយគ្រឿងផ្សំទាំងអស់ឱ្យសព្វ។ លាបលើសក់ ទុក ២០ ទៅ ៣០ នាទី។ លាងជាមួយទឹកត្រជាក់ រួចកក់សក់។
កុំលាងជាមួយទឹកក្តៅ ព្រោះស៊ុតអាចឆ្អិនជាប់សក់។ អ្នកអាឡែស៊ីស៊ុតមិនត្រូវប្រើទេ សូម្បីតែលាបពីខាងក្រៅ។
៥. ទឹកឃ្មុំ
ទឹកឃ្មុំអាចជួយផ្តល់សំណើមដល់សក់ និងស្បែកក្បាលស្ងួត បន្ថយការបាក់សក់ និងធ្វើឱ្យសក់រលោង។
គ្រឿងផ្សំ៖ ទឹកឃ្មុំកន្លះពែង និងប្រេងអូលីវមួយភាគបួនពែង។ សក់ខ្លីអាចប្រើត្រឹមពាក់កណ្ដាល។
របៀបធ្វើ៖ លាយចូលគ្នា ហើយកំដៅឱ្យឧណ្ហៗបន្តិច។ លាបលើសក់ដែលកក់ស្អាត ហើយនៅសើម ចាប់ពីគល់ដល់ចុង។ ពាក់មួកងូតទឹក ទុក ៣០ នាទី។ លាងចេញ រួចកក់សក់ឱ្យស្អាត។
សក់ស្ងួតអាចធ្វើមួយសប្តាហ៍ ២ ដង។ សក់ងាយចេញប្រេងធ្វើត្រឹមមួយសប្តាហ៍ម្តង។
៦. ចេកទុំ
ចេកមានសារធាតុស៊ីលីកា (Silica) ដែលអាចជួយឱ្យសក់រលោង និងមិនសូវប៉ោង។ ការស្រាវជ្រាវលើរូបមន្តនេះនៅមានតិច។
គ្រឿងផ្សំ៖ ចេកទុំ ១ ទៅ ២ ផ្លែ និងប្រេងដូង ១ ស្លាបព្រាបាយ
របៀបធ្វើ៖ កិនឱ្យមអិតល្អ កុំឱ្យនៅដុំ។ លាបលើសក់ ជាពិសេសចុងសក់ដែលបែក។ ទុក ១០ ទៅ ១៥ នាទី រួចលាងជាមួយទឹកឧណ្ហៗ។
សូមលាងឱ្យអស់កំទេចចេក ព្រោះកំទេចដែលនៅសល់អាចធ្វើឱ្យរមាស់ស្បែកក្បាល។
៧. ទឹកដោះគោជូរ
មនុស្សប្រើទឹកដោះគោជូរ (យ៉ាអួ) បំប៉នសក់តាំងពីយូរមកហើយ។ គេជឿថាប្រូតេអ៊ីនក្នុងវាជួយឱ្យសក់រឹងមាំ និងអាស៊ីតឡាក់ទិកជួយសម្អាតស្បែកក្បាល។ ប៉ុន្តែប្រយោជន៍នេះមិនទាន់មានការសិក្សាបញ្ជាក់ទេ។
គ្រឿងផ្សំ៖ ទឹកដោះគោជូរគ្មានស្ករកន្លះពែង ទឹកឃ្មុំ ៣ ទៅ ៤ ស្លាបព្រាបាយ និងប្រេងដូង ២ ស្លាបព្រាបាយ
របៀបធ្វើ៖ លាយឱ្យសព្វ។ លាបលើសក់ពីគល់ដល់ចុង ទុក ២០ ទៅ ៣០ នាទី។ លាងជាមួយទឹកឧណ្ហៗ រួចកក់សក់ស្រាលៗ។
៨. ប្រទាលកន្ទុយក្រពើ
ជ័រប្រទាលកន្ទុយក្រពើផ្តល់សំណើម និងអាចជួយបន្ថយការរលាកស្បែកក្បាល។ ការសិក្សាផ្ទាល់លើសក់នៅមានតិចណាស់។
គ្រឿងផ្សំ៖ ជ័រប្រទាលកន្ទុយក្រពើ ២ ស្លាបព្រាបាយ និងប្រេងដូង ១ ស្លាបព្រាបាយ
របៀបធ្វើ៖ កូរឱ្យសព្វ។ លាបពីកណ្ដាលសក់ទៅចុង រួចទើបលាបស្បែកក្បាល។ ពាក់មួកងូតទឹក ទុក ៣០ នាទី ទៅ ១ ម៉ោង។ លាងចេញ រួចកក់សក់។ ធ្វើមួយសប្តាហ៍ម្តងគឺគ្រប់គ្រាន់។
មនុស្សខ្លះអាឡែស៊ីប្រទាលកន្ទុយក្រពើ ជាពិសេសអ្នកដែលអាឡែស៊ីខ្ទឹមស ឬខ្ទឹមបារាំង។ សូមសាកល្បងលើស្បែកដៃជាមុន។
៩. ទឹកអង្ករ
ទឹកអង្ករជាវិធីបុរាណដែលល្បីខ្លាំងលើបណ្ដាញសង្គម។ ម្សៅក្នុងទឹកអង្ករស្រោបសរសៃសក់ ធ្វើឱ្យសក់រលោង និងងាយសិត។ គ្រូពេទ្យជំនាញស្បែកប្រាប់ថា ភស្តុតាងវិទ្យាសាស្ត្រនៅមានតិច ហើយវាមិនមែនជាថ្នាំធ្វើឱ្យសក់ដុះលឿនទេ។
គ្រឿងផ្សំ៖ អង្ករ និងទឹកស្អាត
របៀបធ្វើ៖ លាងអង្ករម្តងសិន។ ត្រាំអង្ករក្នុងទឹក ៣០ នាទី ទៅ ២ ម៉ោង រួចច្រោះយកទឹក។ ក្រោយកក់សក់រួច ស្រោចទឹកអង្ករលើសក់ ទុកប្រហែល ២០ នាទី រួចលាងចេញឱ្យស្អាត។
កុំត្រាំទុកច្រើនថ្ងៃ ព្រោះអាចមានបាក់តេរី។ បើស្បែកក្បាលកំពុងរលាក សូមកុំប្រើ។
មុនសាកល្បង សូមចាំចំណុចទាំងនេះ
- សាកល្បងអាឡែស៊ីជាមុន។ លាបល្បាយបន្តិចលើកំភួនដៃ ទុក ៣០ នាទី។ បើក្រហម រមាស់ ឬហើម សូមកុំប្រើ។
- កំដៅត្រឹមឧណ្ហៗ។ ល្បាយក្តៅពេកអាចរលាកស្បែកក្បាល។
- លាងឱ្យស្អាត។ គ្រឿងផ្សំដែលនៅសល់ធ្វើឱ្យសក់ស្អិត និងរមាស់។
- កុំរំពឹងលទ្ធផលក្នុងមួយយប់។ សក់ត្រូវការពេលវេលា និងការថែទាំជាប្រចាំ។
ទម្លាប់ការពារសក់ សំខាន់ជាងរូបមន្ត
បើទម្លាប់ដែលធ្វើឱ្យសក់ខូចនៅដដែល ការលាបបំប៉នប៉ុណ្ណាក៏មិនជួយបានច្រើនដែរ។ សមាគមគ្រូពេទ្យជំនាញស្បែកអាមេរិក (AAD) ណែនាំ៖
- ប្រើក្រែមបន្ទន់សក់រាល់ពេលកក់សក់រួច
- រុំសក់ជាមួយកន្សែងឱ្យស្រូបទឹក កុំត្រដុសខ្លាំង
- ប្រើក្រាសធ្មេញស្រឡះ ហើយសិតថ្នមៗ
- ប្រើម៉ាស៊ីនផ្លុំ អ៊ុត ឬដាក់រួញសក់ ក្នុងកម្រិតកម្ដៅទាបបំផុត ហើយមិនឱ្យលើសមួយសប្តាហ៍ម្តង
- កុំចងសក់តឹងពេក
- ទុកចន្លោះ ៨ ទៅ ១០ សប្តាហ៍ រវាងការផាត់ពណ៌ ឬការដាក់ថ្នាំសក់ម្តងៗ
បើថែទាំល្អហើយ សក់នៅតែមិនប្រសើរ ឬសក់ជ្រុះច្រើន សូមទៅជួបគ្រូពេទ្យជំនាញស្បែក។
ប្រភព
- Healthline៖ ល្បាយបំប៉នសក់ពីប្រេងដូង
- Cleveland Clinic៖ ប្រេងអូលីវសម្រាប់សក់
- Healthline៖ ល្បាយបំប៉នសក់ពីផ្លែប័រ
- Healthline៖ ស៊ុតក្រហមសម្រាប់សក់
- Healthline៖ ល្បាយបំប៉នសក់ពីទឹកឃ្មុំ
- Healthline៖ ល្បាយបំប៉នសក់ពីចេក
- Healthline៖ ទឹកដោះគោជូរសម្រាប់សក់
- Healthline៖ ល្បាយបំប៉នសក់ពីប្រទាលកន្ទុយក្រពើ
- Cleveland Clinic៖ ទឹកអង្ករសម្រាប់សក់
- American Academy of Dermatology៖ វិធីការពារសក់កុំឱ្យខូច