ក្រុមមន្ត្រីសន្ដិសុខបាននិយាយថាមានការបំផ្ទុះរថយន្តមួយនៅខេត្តហ្គាហ្សានី ភាគកណ្តាលរបស់ប្រទេសអាហ្វហ្គានីស្ថានបានសម្លាប់សមាជិកកម្លាំងសន្តិសុខអាហ្វហ្គានីស្ថានយ៉ាងតិច ៣០ នាក់នៅថ្ងៃអាទិត្យនេះ ហើយអ្នកស្លាប់និងរបួសអាចកើនឡើងដោយសារអាំងតង់ស៊ីតេនិងទីតាំងនៃការផ្ទុះនេះ។
លោក Baz Mohammad Hemat ប្រធានមន្ទីរពេទ្យខេត្តនៅ Ghazni បាននិយាយថាសាកសព ៣០ នាក់និងមនុស្ស ២៤ នាក់បានរងរបួសត្រូវបានដឹកទៅកាន់ទីនោះ។ លោកបានបន្តថា“ ជនរងគ្រោះទាំងអស់គឺជាបុគ្គលិកសន្តិសុខ។ ក្រុមមន្ត្រីក្នុងតំបន់បាននិយាយថាការផ្ទុះនោះបានផ្តោតសំខាន់ទៅលើបរិវេណនៃកម្លាំងការពារសាធារណៈ ដែលជាស្លាបរបស់កងកំលាំងសន្តិសុខអាហ្វហ្គានីស្ថាន។ ពួកគេបាននិយាយថាវាបានធ្វើឱ្យខូចខាតដល់កន្លែងស្នាក់នៅរបស់ជនស៊ីវិល នៅជុំវិញបរិវេណនោះ ហើយវាអាចមានអ្នកស្លាប់និងរបួសជាច្រើនទៀតនៅទីនោះ។
អ្នកនាំពាក្យក្រសួងមហាផ្ទៃលោក Tariq Arian បានបញ្ជាក់ថាមានការផ្ទុះគ្រាប់បែកក្នុងរថយន្ត ប៉ុន្តែមិនបានផ្តល់ព័ត៌មានបន្ថែមអំពីគោលដៅឬគ្រោះថ្នាក់ដល់អាយុជីវិតនោះទេ។ ហើយមកដល់ពេលនេះ គ្មាននរណាម្នាក់អះអាងទទួលខុសត្រូវចំពោះការវាយប្រហារនេះទេ។
ចំណែកអ្នកនាំពាក្យក្រុមឧទ្ទាមតាលីបង់ លោក Zabihullah Mujahid ពេលដែលភ្នាក់ងារកាសែត Reutersទាក់ទងទៅ មិនបានបញ្ជាក់ ឬបដិសេធការទទួលខុសត្រូវទេ។ ប្រទេសអាហ្វហ្គានីស្ថានមានការផ្ទុះគ្រាប់បែកក្នុងរថយន្តក្នុងរយៈពេលប៉ុន្មានខែចុងក្រោយនេះជាញឹកញាប់ទោះបីជាមានកិច្ចចរចាសន្តិភាពបាននឹងកំពុងដំណើរការ រវាងក្រុមចរចារបស់ក្រុមឧទ្ទាមតាលីបង់ដែលកំពុងបះបោរ និងរដ្ឋាភិបាលនៅរដ្ឋធានីដូហាប្រទេសកាតាក៏ដោយ។
រដ្ឋាភិបាល និងស្ថាប័នការបរទេសបាននិយាយថា អំពើហឹង្សានៅក្នុងប្រទេសនៅក្នុងសង្គ្រាមអស់រយៈពេលពីរទសវត្សនៅតែមានកំរិតខ្ពស់មិនអាចទទួលយកបាន ដោយអំពាវនាវឱ្យមានបទឈប់បាញ់គ្នាជាបន្ទាន់រវាងរដ្ឋាភិបាលអាហ្វហ្គានីស្ថាននិងឧទ្ទាមតាលីបង់។ អ្នកនាំពាក្យអភិបាលខេត្តលោក Gul Islam Syaal បាននិយាយថាការបំផ្ទុះគ្រាប់បែកមួយទៀតនៅថ្ងៃអាទិត្យ នៅភាគខាងកើតនៃខេត្ត Zabul ដោយផ្តោតលើមន្ត្រីថ្នាក់ខេត្តម្នាក់ បានសម្លាប់មនុស្សយ៉ាងហោចណាស់ម្នាក់ និងរងរបួស ២៣ នាក់។
Haji Ata Jan Haqbayan ប្រធានក្រុមប្រឹក្សាខេត្ត Zabul បានរងរបួសស្រាលក្នុងការវាយប្រហារទៅលើក្បួនរថយន្តរបស់គាត់។ គ្មាននរណាម្នាក់អះអាងទទួលខុសត្រូវចំពោះការវាយប្រហារទៅលោក Haji Ata Jan Haqbayan ដែលជាធ្លាប់ជាអ្នកនិយាយរិះគន់ចំ ៗ ទៅលើពួកតាលីបង់ឡើយ៕
ប្រភព៖ reuters