AK-47៖ អ្វីៗដែលគួរដឹងអំពីកាំភ្លើងដ៏ល្បីល្បាញមួយនេះ

កាំភ្លើង AK-47 ប្រហែលជាអាវុធដែលត្រូវបានគេប្រើប្រាស់យ៉ាងទូលំទូលាយបំផុតនៅលើពិភពលោក។ វាត្រូវបានប្រើប្រាស់ទាំងដោយក្រុមសត្រូវ និងសម្ព័ន្ធមិត្តរបស់សហរដ្ឋអាមេរិកចាប់តាំងពីឆ្នាំ ១៩៤៧ មក ហើយវាគឺជាអាវុធស្តង់ដារសម្រាប់កងទ័ពថ្មើរជើងនៅក្នុងប្រទេសចំនួន ១០៦។ គេប៉ាន់ប្រមាណថាមានកាំភ្លើង AK-47 ចំនួន ១០០ លានដើម (ដែលមានទម្រង់ផ្សេងៗគ្នា) កំពុងមានវត្តមាននៅជុំវិញពិភពលោក។

វាជាអាវុធដ៏ពេញនិយមក្នុងចំណោមអ្នកដែលចូលចិត្តកាំភ្លើង ទាហានអាជីព និងក្រុមភេរវករ។ នៅសហរដ្ឋអាមេរិក វាត្រូវបានគេស្គាល់ថាជាអាវុធរបស់ “តួអង្គអាក្រក់” ដោយសារតែប្រវត្តិ និងការប្រើប្រាស់វាពីសំណាក់ក្រុមដែលធ្លាប់ជាសត្រូវជាច្រើន។ ដូច្នេះ វាជារឿងធម្មតាទេដែលអ្នកអានមានសំណួរជាច្រើនពាក់ព័ន្ធនឹងអាវុធនេះ។

1. តើ “AK-47” មានន័យដូចម្តេច?

ឈ្មោះជាភាសារុស្ស៊ីរបស់វាគឺ Avtomat Kalashnikova ដែលគេស្គាល់ជាទូទៅថា Kalashnikov។ វាត្រូវបានដាក់ឈ្មោះតាមអ្នកបង្កើតវា គឺនាយទាហានជាន់ខ្ពស់ Mikhail Kalashnikov។ គេជឿថាគាត់ធ្លាប់ជាមេបញ្ជាការរថក្រោះ T-34 ដែលបានរងរបួសនៅក្នុងកងទ័ពក្រហម (Red Army) អំឡុងសង្គ្រាមលោកលើកទី ២។ យោងតាមរឿងដំណាល គាត់ធ្លាប់កោតសរសើរចំពោះអាវុធដែលផលិតដោយពួកណាស៊ី។

បន្ទាប់ពីចំណាយពេលប្រាំឆ្នាំលើការងារផ្នែកវិស្វកម្ម អតីតវិស្វករកសិកម្មរូបនេះបានបង្កើតអាវុធដ៏ល្បីល្បាញរបស់គាត់។ វាត្រូវបានបង្កើតឡើងដោយផ្អែកលើគំរូនៃការរចនាផ្សេងៗដែលមាននៅពេលនោះ ជាពិសេសគឺកាំភ្លើង Sturmgewehr-44 របស់អាល្លឺម៉ង់។ កាំភ្លើង Sturmgewehr ដែលហៅកាត់ថា StG-44 គឺជាកាំភ្លើងវែងសម្រាប់ទាហានថ្មើរជើងប្រភេទបាញ់រយៈចម្ងាយមធ្យមដំបូងគេបង្អស់ដែលមានប្រសិទ្ធភាពពិតប្រាកដ។ ទោះបីជាវាប្រើគ្រាប់មិនធ្ងន់ក៏ដោយ ក៏វាអាចបាញ់តបតបានយ៉ាងខ្លាំងក្លា។ កាំភ្លើង AK-47 ក៏ត្រូវបានរចនាឡើងដើម្បីផ្តល់នូវសមត្ថភាពដូចគ្នានេះដែរ។

ប៉ុន្តែចំណុចដ៏អស្ចារ្យពិតប្រាកដនៃការបង្កើតរបស់លោក Kalashnikov គឺភាពសាមញ្ញរបស់វា។ វាត្រូវបានរចនាឡើងដើម្បីឱ្យងាយស្រួលប្រើប្រាស់គ្រប់ជ្រុងជ្រោយ៖ ងាយស្រួលជួសជុល ងាយស្រួលដោះស្រាយបញ្ហាករណីកាំភ្លើងកកស្ទះ (ប្រសិនបើមានបញ្ហានេះកើតឡើង) និងងាយស្រួលថែទាំ។ ប្រសិនបើមានគ្រាប់នៅក្នុងបំពង់កាំភ្លើង AK-47 នោះឱកាសដែលកាំភ្លើងនឹងបាញ់ចេញគឺមានកម្រិតខ្ពស់ណាស់។

ការបង្កើតរបស់គាត់មានភាពសាមញ្ញ និងអាចទុកចិត្តបានយ៉ាងខ្លាំង រហូតធ្វើឱ្យសហភាពសូវៀតចាប់ផ្តើមនាំចេញអាវុធនេះក្នុងបរិមាណដ៏ច្រើនសន្ធឹកសន្ធាប់។ ប្រទេសនេះរកចំណូលបានយ៉ាងច្រើនពីការនាំចេញអាវុធនេះ ដែលជាហេតុធ្វើឱ្យលោក Kalashnikov ទទួលបានការយកចិត្តទុកដាក់ពិសេសទាំងនៅក្នុងសហភាពសូវៀត និងក្រោយមកទៀតនៅក្នុងប្រទេសរុស្ស៊ី រហូតដល់ថ្ងៃចុងក្រោយនៃជីវិតរបស់គាត់។

2. តើ AK-47 ខុសច្បាប់ឬទេ?

ភាពស្របច្បាប់នៃការកាន់កាប់កាំភ្លើង AK-47 គឺអាស្រ័យលើប្រទេសដែលអ្នកកំពុងស្ថិតនៅ។ នៅក្នុងប្រទេសជាច្រើន ការកាន់កាប់កាំភ្លើងម៉ូដែល AK មិនត្រឹមតែស្របច្បាប់ប៉ុណ្ណោះទេ ប៉ុន្តែថែមទាំងត្រូវបានចាត់ទុកថាជាការចាំបាច់ ឬជាវត្ថុដែលគេឱ្យតម្លៃខ្ពស់ទៀតផង។ កាំភ្លើងម៉ូដែល AK-47 មានតម្លៃថោកខ្លាំងនៅតាមតំបន់ជាច្រើនជុំវិញពិភពលោក ប៉ុន្តែតម្លៃរបស់វានឹងកាន់តែខ្ពស់នៅពេលដែលទីតាំងនោះស្ថិតនៅឆ្ងាយពីមជ្ឈមណ្ឌលផលិត។

យោងតាមការសិក្សាមួយកាលពីឆ្នាំ ២០១៧ ស្តីពីឧក្រិដ្ឋកម្មឆ្លងដែននៅក្នុងប្រទេសកំពុងអភិវឌ្ឍន៍ តម្លៃកាំភ្លើង AK-47 នៅលើទីផ្សារងងឹតមានចាប់ពី ១៥០ ដុល្លារ (នៅប្រទេសប៉ាគីស្ថាន) រហូតដល់ ៣,៦០០ ដុល្លារ (នៅលើបណ្តាញ Dark Web សម្រាប់ការដឹកជញ្ជូនទៅកាន់សហរដ្ឋអាមេរិក)។ ទោះជាយ៉ាងណាក៏ដោយ តម្លៃកាំភ្លើងត្រកូល AK នៅតំបន់អាហ្វ្រិកគឺខុសប្លែកពីនិន្នាការទូទៅនេះ។ ជាទូទៅ កាំភ្លើងប្រភេទនេះមានតម្លៃថោកជាងច្រើននៅក្នុងប្រទេសអាហ្វ្រិកមួយចំនួន ដោយសារតម្រូវការមានកម្រិតខ្ពស់ខ្លាំង ដែលធ្វើឱ្យទីផ្សារសម្បូរទៅដោយកាំភ្លើងប្រភេទនេះ។

3. តើ AK-47 អាចបាញ់បានលឿនប៉ុណ្ណា?

AK-47 ជំនាន់យោធាមានប្រព័ន្ធបាញ់ដែលអាចបាញ់ជាបន្តបន្ទាប់បាន។ ល្បឿនបាញ់តាមលក្ខណៈបច្ចេកទេសត្រូវបានរាយការណ៍ថា ប្រហែល 600 គ្រាប់ក្នុងមួយនាទី។ ទោះជាយ៉ាងណា ល្បឿនបាញ់តាមទ្រឹស្តីមិនមានន័យថា អ្នកប្រើប្រាស់នឹងអាចបាញ់បានចំនួននោះជាក់ស្តែងក្នុងស្ថានភាពប្រយុទ្ធឡើយ។

4. តើខ្ញុំអាចទិញកាំភ្លើង AK-47 ដោយស្របច្បាប់នៅក្នុងសហរដ្ឋអាមេរិកបានដែរឬទេ?

ការផ្សាយពាណិជ្ជកម្ម

សម្រាប់អ្នកដែលចង់បានកាំភ្លើង AK នៅអាមេរិក វាអាស្រ័យលើរដ្ឋដែលអ្នករស់នៅ។ ទោះជាយ៉ាងណាក៏ដោយ ជាទូទៅ កាំភ្លើង AK-47 ពិតប្រាកដមានមុខងារបាញ់ស្វ័យប្រវត្តិពេញលេញ (fully automatic) ដែលជាការខុសច្បាប់នៅក្នុងសហរដ្ឋអាមេរិក។ ប៉ុន្តែមានកាំភ្លើងម៉ូដែលដែលមានមុខងារបាញ់ពាក់កណ្តាលស្វ័យប្រវត្តិ (semi-automatic) ដែលអាចរកទិញបាន និងស្របច្បាប់នៅក្នុងសហរដ្ឋអាមេរិក។ ក្រុមហ៊ុនផលិតមិនអាចផលិត ឬនាំចូលអាវុធស្វ័យប្រវត្តិពេញលេញសម្រាប់ទីផ្សារស៊ីវិលបានទេ។

ប៉ុន្តែ អ្នកនៅតែអាចទិញកាំភ្លើង AK-47 ប្រភេទស្វ័យប្រវត្តិពេញលេញបានដោយស្របច្បាប់។ ព្រោះនេះគឺជាសហរដ្ឋអាមេរិក។ រាល់អាវុធស្វ័យប្រវត្តិដែលត្រូវបានចុះបញ្ជីត្រឹមត្រូវមុនខែឧសភា ឆ្នាំ១៩៨៦ (មុនពេលអនុម័តច្បាប់ការពារម្ចាស់អាវុធ ឬ Firearm Owners Protection Act) គឺអាចទិញ ឬលក់បាន។ នេះមានន័យថា មានទីផ្សារសម្រាប់អាវុធស្វ័យប្រវត្តិស្របច្បាប់ប្រហែល ១៧៥,០០០ ដើមនៅក្នុងសហរដ្ឋអាមេរិក។ ការផ្គត់ផ្គង់ស្របច្បាប់ដែលមានកម្រិតនេះ ក៏មានន័យថា កាំភ្លើងប្រភេទនេះមួយដើមអាចមានតម្លៃថ្លៃកប់ពពក — មិនទាន់គិតដល់ការត្រួតពិនិត្យយ៉ាងតឹងរ៉ឹងពីសំណាក់ស្ថាប័ន ATF (Bureau of Alcohol, Tobacco, Firearms and Explosives) និងពន្ធពិសេសចំនួន ២០០ ដុល្លារផងដែរ។

ប៉ុន្តែ ប្រសិនបើអ្នកមានលទ្ធភាពចំណាយប្រាក់ ១៥,០០០ ដុល្លារសម្រាប់កាំភ្លើង AK-47 ប្រភេទស្វ័យប្រវត្តិស្របច្បាប់មួយដើមនោះ ប្រាក់ ២០០ ដុល្លារទំនងជាមិនមែនជាបញ្ហាសម្រាប់អ្នកឡើយ។

5. តើ AK-47 មានគ្រោះថ្នាក់កម្រិតណា?

បើនិយាយជារួម AK-47 គឺជាអាវុធដ៏សាហាវបំផុតដែលធ្លាប់ត្រូវបានបង្កើតឡើង។ ចំនួនអ្នកស្លាប់ដែលបណ្តាលមកពីអាវុធនេះគឺមានច្រើនជាងចំនួនអ្នកស្លាប់ដោយសារអាវុធនុយក្លេអ៊ែរទៅទៀត។ ប៉ុន្តែ AK-47 ស៊េរីដំបូងៗមាន​ទម្ងន់ធ្ងន់ខ្លាំង ហើយមិនត្រូវបានរចនាឡើងសម្រាប់ការតម្រង់គោលដៅបានល្អនោះទេ។ លោក Kalashnikov ចង់បង្កើតអាវុធដែលមានទំហំតូចល្មម ប៉ុន្តែនៅតែមានកម្លាំងបាញ់ខ្លាំងក្នុងរយៈចម្ងាយ ៣០០ ម៉ែត្រ ដែលអាចបាញ់គ្រាប់ចេញបានយ៉ាងច្រើនសន្ធឹកសន្ធាប់ (ដោយគ្រាប់មានទម្ងន់ស្រាលល្មម ដែលអនុញ្ញាតឱ្យទាហានអាចយកតាមខ្លួនបានច្រើន)។

អាវុធ Kalashnikov ស៊េរីឆ្នាំ ១៩៤៧ ពិតប្រាកដ គឺពិបាកបាញ់បន្តិចបើធៀបនឹងអាវុធថ្មើរជើងទូទៅ ប៉ុន្តែវាមានភាពងាយស្រួលក្នុងការផលិត និងងាយស្រួលក្នុងការប្រើប្រាស់។ អាវុធ AK ដែលយើងឃើញសព្វថ្ងៃនេះ តាមពិតទៅគឺជាប្រភេទ AKM (ដែលត្រូវបានកែសម្រួលឱ្យទំនើបជាងមុន) និងជាប្រភេទផ្សេងៗទៀតដែលវិវត្តចេញពី AKM។ ទោះជាយ៉ាងណាក៏ដោយ មនុស្សគ្រប់គ្នានៅតែហៅវាថា AK-47 ឬហៅខ្លីៗថា “AK” ដដែល ព្រោះឈ្មោះនេះស្តាប់ទៅមានភាពទាក់ទាញ។

អាវុធនេះប្រើប្រាស់គ្រាប់ទំហំ ៧.៦២ មីលីម៉ែត្រ ដែលមានល្បឿនលឿន ហើយអាច “បំផ្លាញផ្នែកធំៗនៃរាងកាយ” នេះបើយោងតាមសម្តីរបស់គ្រូពេទ្យវះកាត់ព្យាបាលរបួសធ្ងន់ធ្ងរនៅទីក្រុងញូវយ៉ក។ គ្រាប់កាំភ្លើងនេះធ្វើឱ្យឆ្អឹងបាក់ខ្ទេច ហែកសរីរាង្គខាងក្នុង និងធ្វើឱ្យជាលិកាផ្សេងៗទៀតប្រែជាសភាពដូចរាវ នៅពេលដែលគ្រាប់នោះវិលវល់ជ្រៀតចូលទៅក្នុងរាងកាយ ដែលជារឿយៗបង្កជាការខូចខាតធ្ងន់ធ្ងររហូតដល់មិនអាចព្យាបាលឱ្យជាសះស្បើយបានឡើយ។

6. តើកងទ័ពអាមេរិកប្រើប្រាស់កាំភ្លើង AK-47 ដែរឬទេ?

នៅពេលដែលកាំភ្លើងវែង M16 ត្រូវបានដាក់ឱ្យប្រើប្រាស់ជាលើកដំបូងក្នុងអំឡុងសង្គ្រាមវៀតណាម វាមានបញ្ហាជាច្រើន។ បញ្ហាទាំងនោះមានសភាពធ្ងន់ធ្ងររហូតដល់ថ្នាក់ទាហានអាមេរិកត្រូវបាត់បង់ជីវិតនៅក្នុងសមរភូមិ ដោយសារតែពួកគេមិនអាចបាញ់តបតបាន។ សូម្បីតែបន្ទាប់ពីបញ្ហាបច្ចេកទេសទាំងនោះត្រូវបានដោះស្រាយរួចរាល់ហើយក៏ដោយ ក៏កាំភ្លើង M16 ដែលមានភាពកខ្វក់ នៅតែមានលទ្ធភាពដំណើរការបានតិចជាងកាំភ្លើង AK-47 ដែលមានភាពកខ្វក់ដូចគ្នា។ ហេតុដូច្នេះហើយ ទើបគេដឹងថាទាហានអាមេរិកតែងតែរើសយកកាំភ្លើង AK ពីសត្រូវដែលបានស្លាប់មកទុកប្រើប្រាស់… ទុកសម្រាប់ករណីចាំបាច់។

7. ហេតុអ្វីបានជាក្រុមប្រដាប់អាវុធខុសច្បាប់ប្រើ AK-47 ច្រើន?

កាំភ្លើងនេះត្រូវបានរចនាឡើងដើម្បីឱ្យបុគ្គលគ្រប់រូបនៅក្នុងតំបន់—ដែលត្រូវការប្រើប្រាស់វា—អាចកាន់ ថែទាំ និងបាញ់វាបានយ៉ាងងាយស្រួល។ ហើយប្រសិនបើអ្នកត្រូវការអាវុធដូចជា AK-47 អ្នកចាំបាច់ត្រូវអាចប្រើវាបានយ៉ាងឆាប់រហ័ស មិនថាអ្នកជាទាហានអាជីព ឬជាទាហានកេណ្ឌដែលមិនសូវបានទទួលការហ្វឹកហាត់ត្រឹមត្រូវនោះទេ។

ភាពងាយស្រួលក្នុងការស្វែងរក និងភាពធន់របស់កាំភ្លើង AK-47 នៅទូទាំងពិភពលោក បានធ្វើឱ្យវាក្លាយជាអាវុធដ៏ទាក់ទាញសម្រាប់ក្រុមភេរវករ ក្រុមប្រដាប់អាវុធក្នុងស្រុក (militias) និងអង្គការប្រដាប់អាវុធខុសច្បាប់ផ្សេងទៀត។ មិនថាពួកគេកំពុងព្យាយាមវាយយកមូលដ្ឋានយោធានៅតំបន់ត្រជាក់ខ្លាំង ឬកំពុងព្យាយាមផ្តួលរំលំរដ្ឋាភិបាលនៅតំបន់អាហ្វ្រិកខាងត្បូងវាលខ្សាច់សាហារ៉ា (Sub-Saharan Africa) នោះទេ កាំភ្លើង AK-47 ដំណើរការបានយ៉ាងល្អនៅក្នុងគ្រប់ស្ថានភាពបរិយាកាស។ វាងាយស្រួលរកទិញ (ជាញឹកញាប់ក្នុងតម្លៃថោក) ហើយវានៅតែអាចដំណើរការបាន ទោះបីជាវាធ្លាក់ចូលទៅក្នុងទឹក ភក់ ខ្សាច់ ឬកាកសំណល់ផ្សេងៗក៏ដោយ។

អាយុកាលជាមធ្យមរបស់ភេរវករម្នាក់ក្នុងអំឡុងពេលនៃការប្រយុទ្ធដោយអាវុធគឺមិនវែងនោះទេ ដូច្នេះកាំភ្លើងនោះទំនងជានឹងធ្លាក់ទៅលើដី ហើយនឹងមាននរណាម្នាក់ត្រូវការឱ្យវាដំណើរការនៅពេលដែលពួកគេរើសវាឡើងមកប្រើ។ ក្រុមភេរវករពិតជាត្រូវការអាវុធជំនួសដែលមានតម្លៃថោក។

ប្រែសម្រួលពី៖ military.com