១០ ទម្លាប់ដែលអ្នកស្រាវជ្រាវឃើញថាខុសគ្នារវាងអ្នកមាន និងអ្នកមានប្រាក់ចំណូលទាប

មនុស្សគ្រប់គ្នារកវិធីបង្កើនទ្រព្យសម្បត្តិខុសៗគ្នា។ អ្នកខ្លះទិញ Bitcoin តាំងពីថោក។ អ្នកខ្លះខិតខំធ្វើការ។ អ្នកខ្លះមានសំណាង។ អ្នកខ្លះធ្វើការខ្លាំង តែនៅតែពិបាកសន្សំ។

អ្នកស្រាវជ្រាវ Tom Corley ចាប់អារម្មណ៍លើភាពខុសគ្នានៃទម្លាប់។ លោកសិក្សាក្រុមពីររយៈពេល ៥ ឆ្នាំ រួចធ្វើការសន្និដ្ឋានដូចខាងក្រោម។ នេះជាលទ្ធផលសង្កេត មិនមែនមានន័យថាគ្រប់អ្នកមាន ឬគ្រប់អ្នកក្រដូចគ្នាទេ។

១. មិនចូលចិត្តជួបមនុស្សថ្មី

អ្នកមានច្រើនចូលចិត្តស្គាល់មនុស្សថ្មី។ តាម Corley ៦៨% នៃអ្នកមាននិយាយថាចូលចិត្តជួបមនុស្សថ្មី។ ក្នុងចំណោមអ្នកមានប្រាក់ចំណូលទាប មានតែ ១១%។ អ្នកដែលឈានដល់ជីវភាពធូរធារច្រើនខិតខំរក្សាទំនាក់ទំនងល្អ ទាំងមនុស្សថ្មី និងមនុស្សចាស់។

២. ទុកអ្វីៗលើជោគវាសនា

ជឿសំណាងបាន តែកុំទុកគ្រប់បញ្ហាលើវាសនា។ Corley ថាអ្នកមានច្រើនគិតថាខ្លួនកំណត់ផ្លូវជីវិតបាន។ ចំណែក ៩០% នៃអ្នកមានប្រាក់ចំណូលទាប បន្ទោសសំណាងអាក្រក់ និងរឿងដែលគ្រប់គ្រងមិនបាន។ អ្នកខ្លះងាកទៅល្បែងស៊ីសង ឬឆ្នោត ជំនួសការប្រើចំណេះដឹង និងផែនការ។

៣. ស្អប់ការងាររបស់ខ្លួន

៨៥% នៃមនុស្សជោគជ័យផ្នែកហិរញ្ញវត្ថុនិយាយថា «ខ្ញុំស្រឡាញ់អ្វីដែលខ្ញុំធ្វើ»។ អ្នកដែលមិនសប្បាយនឹងការងារ ច្រើនឃើញតែចំណុចខ្វះ។ បើមិនស្រឡាញ់ការងារបច្ចុប្បន្ន គួរគិតពីការប្តូរ មិនមែននៅតែធ្វើទាំងចិត្តមិនចង់។

៤. មិនថែសុខភាព

អ្នកមានច្រើនចំណាយពេលលើសុខភាព៖ ពិនិត្យសុខភាព ហាត់ប្រាណ ញ៉ាំឱ្យមានតុល្យភាព និងកាត់ទម្លាប់អាក្រក់។ ៧៦% នៃមនុស្សជោគជ័យហាត់ប្រាណប្រហែល ៤ ដងក្នុងមួយសប្តាហ៍។ ក្នុងចំណោមអ្នកមានប្រាក់ចំណូលទាប មានតែ ១៣% ឃើញច្បាស់ថាសុខភាពភ្ជាប់នឹងភាពជោគជ័យ។

៥. មិនហ៊ានប្រថុយតាមផែនការ

មានតែ ៦% នៃអ្នកមានប្រាក់ចំណូលទាប ព្រមប្រថុយដើម្បីធ្វើឱ្យហិរញ្ញវត្ថុប្រសើរ។ ចំណែកអ្នកមានជាង ៥០% ព្រមទទួលហានិភ័យគណនាបាន។ អ្នកមានខ្លះធ្លាប់បរាជ័យធំ តែព្យាយាមបន្ត និងដោះស្រាយ។

៦. មើលទូរទស្សន៍ច្រើនពេក

តាមការសង្កេតនេះ ៧៨% នៃអ្នកមិនមែនជាអ្នកមាន ចូលចិត្តមើលកម្មវិធីជីវិតឯកជនអ្នកដទៃ។ ក្នុងចំណោមអ្នកមាន មានតែប្រហែល ៦%។ អ្នកមានច្រើនមើលទូរទស្សន៍តិចជាង ១ ម៉ោងក្នុងមួយថ្ងៃ។ អ៊ីនធឺណិតក៏ដូចគ្នា៖ ប្រើតិច លុះត្រាតែចាំបាច់សម្រាប់ការងារ។

៧. មិនអានសៀវភៅ

មានសម្តីថា «មិនអាន មានន័យថាមិនគិត»។ ៨៨% នៃអ្នកមានយល់ស្រប។ ពួកគេអានសៀវភៅអភិវឌ្ឍខ្លួន សៀវភៅវិជ្ជាជីវៈ ឬប្រវត្តិសាស្ត្រ យ៉ាងហោច ៣០ នាទីក្នុងមួយថ្ងៃ។ មានតែ ២% នៃអ្នកមានប្រាក់ចំណូលទាប ចំណាយពេលច្រើនលើការអាន។

៨. ក្រោកពីគេងយឺត

ជាងពាក់កណ្តាលនៃអ្នកជំនួញដែល Corley សង្កេត ភ្ញាក់យ៉ាងហោច ៣ ម៉ោងមុនម៉ោងចាប់ផ្តើមធ្វើការ ប្រហែលម៉ោង ៥ ព្រឹក។ ពួកគេប្រើពេលព្រឹកដើម្បីរៀបផែនការ ធ្វើគម្រោងផ្ទាល់ខ្លួន និងហាត់ប្រាណ។

មនុស្សជោគជ័យខ្លះចំណាយ ១០–១៥ នាទីសម្រាប់សមាធិ ឬគិតស្ងៀម។ ក្រោកព្រលឹមមិនមានន័យថាគេងតិចទេ។ ៨៩% នៃអ្នកមានគេង ៧–៨ ម៉ោង ហើយចូលគេងប្រហែលម៉ោង ៩–១០ យប់។

៩. នៅក្បែរមនុស្សដែលត្អូញត្អែរជាប់

៩៦% នៃអ្នករស់លើប្រាក់ខែ ស្គាល់នរណាម្នាក់ដែលចូលចិត្តនិយាយដើម ឬត្អូញត្អែរជីវិត។ មនុស្សជោគជ័យច្រើននៅក្បែរមនុស្សវិជ្ជមាន និងខិតខំ។ អាចបង្កើនមនុស្សល្អនៅជុំវិញដោយទៅព្រឹត្តិការណ៍វប្បធម៌ ធ្វើការ៍ស្ម័គ្រចិត្ត ឬចូលសមាគម។ ចំណាយពេលលើខ្លួនឯង រហូតជួបមនុស្សសមនឹងពេលវេលារបស់អ្នក។

១០. ចំណាយលើសចំណូល

អ្នកមានប្រាក់ចំណូលទាបភាគច្រើនចំណាយលើសអ្វីដែលរកបាន។ អ្នកខ្លះទិញឡាន ទូរស័ព្ទ ឬរបស់ថ្លៃ ទោះមិនទាន់មានលទ្ធភាព។ អ្នកមានច្រើនចែកប្រាក់តាមផែនការ។

ឧទាហរណ៍ការបែងចែកមួយ៖

• ២០% ទុកសន្សំ
• ២៥% ថ្លៃផ្ទះ ឬបញ្ចាំ
• ១៥% អាហារ
• ១០% កម្សាន្ត
• ៥% ធ្វើដំណើរ
• នៅសល់៖ សម្លៀកបំពាក់ ថ្នាំពេទ្យ ការអប់រំ

តើមានចំណុចណាទៀតដែលអ្នកគិតថាជួយឱ្យប្រាក់ចំណូលកើន?

ប្រែសម្រួលដោយ៖ ក្នុងស្រុក
ចំណាំ៖ ភាគរយទាំងនេះចេញពីការសិក្សារបស់ Tom Corley មិនមែនជាច្បាប់ថេរសម្រាប់គ្រប់គ្នាទេ។