៧ សញ្ញាបង្ហាញថាអ្នកជាឪពុកម្តាយល្អសម្រាប់កូន

ឪពុកម្តាយគ្រប់គ្នាព្យាយាមធ្វើអ្វីដែលល្អបំផុតសម្រាប់កូន។ អ្នកខ្លះតឹងរ៉ឹង អ្នកខ្លះធូរ ប៉ុន្តែទាំងអស់កំពុងធ្វើអ្វីដែលខ្លួនគិតថាត្រូវ។ ទោះយ៉ាងណា ពេលខ្លះឪពុកម្តាយភ្លេចអ្វីដែលសំខាន់បំផុតសម្រាប់កូន។

តាមគេហទំព័រ Bright Side នេះជាចំណុចសំខាន់ៗ ដែលបង្ហាញថាអ្នកកំពុងធ្វើជាឪពុកម្តាយល្អ។

១. កូនហ៊ានចែករំលែកបញ្ហាជាមួយអ្នក

វាល្អណាស់ពេលកូនប្រាប់ពីជោគជ័យ។ ប៉ុន្តែសំខាន់ជាងនេះ គឺពួកគេហ៊ានប្រាប់ពីបញ្ហាផងដែរ។ កុមារត្រូវការនរណាម្នាក់ស្តាប់ គាំទ្រ និងលើកទឹកចិត្ត។ ពួកគេគួរយល់ថាការធ្វើខុសមិនមែនជារឿងអាក្រក់ដល់ទីបញ្ចប់ទេ បើមានឪពុកម្តាយនៅក្បែរ។

២. អ្នកមិនចាត់ទុកពិន្ទុជារឿងសំខាន់បំផុត

បើកូនបានពិន្ទុមិនល្អ ពួកគេមិនគួរភ័យខ្លាចប្រាប់អ្នកទេ។ កុមារដែលខ្លាចច្រើនលាក់ពិន្ទុ ហើយភ័យពេលគិតថាឪពុកម្តាយដឹង។ ឪពុកម្តាយល្អពន្យល់ថាការរៀនឱ្យយល់ និងមានចំណេះដឹងសំខាន់ជាងពិន្ទុ។

៣. ផ្តល់ភាពឯកជនដល់កូន

ឪពុកម្តាយខ្លះប្រាប់កូនឱ្យគោះទ្វារមុនចូលបន្ទប់ តែខ្លួនឯងមិនធ្វើតាម។ ច្បាប់ក្នុងគ្រួសារគួរដូចគ្នាសម្រាប់គ្រប់គ្នា។ គោរពកន្លែងឯកជនរបស់កូន ពួកគេនឹងរៀនគោរពអ្នកវិញ។

៤. មិនប្រមាថ ឬដាក់ឈ្មោះអាក្រក់លើកូន

ឪពុកម្តាយល្អមិនហៅកូនថាល្ងង់ ធាត់ ឬខ្ជិលទេ។ ពាក្យទាំងនេះអាចធ្វើឱ្យកូនឈឺចាប់យូរ មានពេលអស់មួយជីវិត។ អាចនិយាយថាអ្នកខកចិត្ត ប៉ុន្តែកុំជេរប្រមាថ។ ជ្រើសពាក្យឱ្យប្រុងប្រយ័ត្ន។

៥. ហ៊ានសារភាពកំហុស និងសុំទោស

កុមារ និងមនុស្សពេញវ័យសុទ្ធតែធ្វើខុស។ ឪពុកម្តាយភាគច្រើនបង្រៀនកូនឱ្យសុំទោស តែភ្លេចបង្ហាញដោយខ្លួនឯង។ បើអ្នកធ្វើខុស កុំខ្មាស់សុំទោសកូន។ អ្នកដែលទទួលស្គាល់ភាពទន់ខ្សោយរបស់ខ្លួន គឺជាមនុស្សខ្លាំង។

៦. ទុកឱ្យកូនដើរតាមទេពកោសល្យរបស់ពួកគេ

កុមារគួរធ្វើអ្វីដែលពួកគេចូលចិត្ត មិនមែនតែអ្វីដែលឪពុកម្តាយចូលចិត្ត។ វាល្អណាស់បើឪពុកលេងបាល់ទាត់ ហើយកូនក៏ចូលចិត្តដែរ។ ប៉ុន្តែកូនអាចចូលចិត្តតន្ត្រី ឬរាំវិញ។ កុំបង្ខំកូនឱ្យរស់ក្នុងសុបិនរបស់អ្នក។ ឪពុកម្តាយល្អលើកទឹកចិត្តកូនឱ្យអភិវឌ្ឍខ្លួន និងរីករាយនឹងអ្វីដែលពួកគេស្រឡាញ់។

៧. ទុកចិត្តលើពាក្យសម្ដីរបស់កូន

មានពេលគ្រូប្រាប់ថាកូនធ្វើខុស។ ឪពុកម្តាយខ្លះមិនសួរឱ្យច្បាស់ ទៅដល់ផ្ទះស្តីបន្ទោសភ្លាម។ ឪពុកម្តាយល្អសួរកូនពីមូលហេតុជាមុន។ វាអាចមិនមែនកំហុសរបស់កូនទេ ហើយពួកគេអាចកំពុងត្រូវការជំនួយពីអ្នក។

ការធ្វើជាឪពុកម្តាយល្អ មិនមែនមានន័យថាឥតខ្ចោះទេ។ វាគឺការស្តាប់ គោរព និងនៅក្បែរកូន ទាំងពេលល្អ និងពេលខុស។

ប្រភព៖ Brightside