ថ្មីនេះ តារាសម្ដែងស្រស់សង្ហា និង ជាអ្នកប្រដាល់ នៅក្នុងប្រទេសថៃដ៏ល្បីឈ្មោះម្នាក់មានមុខមាត់ដូចជនបរទេស គឺ លោក Antoine Pinto ស្រាប់តែបានអះអាងថាខ្លួនឯងមិនមែនជាជនជាតិថៃឡើយ នោះគឺមានឈាមជ័រកាត់ខ្មែរដែលជាជនជាតិអាស៊ី។
ការបញ្ជាក់នេះ បានធ្វើឡើងនៅក្នុងគណនីហ្វេសប៊ុកផ្លូវការរបស់ លោក Antoine Pinto តែម្តង ដោយលោក បាននិយាយថា នេះជាការបកស្រាយក្រោយមហាជនបានសង្ស័យថាតើលោកមានមុខមាត់បារាំងកាត់អាស៊ី តើមកលោកជាជនជាតិអាស៊ី ឬកាត់ថៃមែនឬក៏អត់នោះ។ លោកបានប្រាប់ថា ការពិត លោកមានឪពុកជាជនជាតិបារាំងកើតនៅបារាំង ហើយម្ដាយលោកជាកូនបារាំងកើតនៅបារាំងតែកាត់ខ្មែរ ដូចនេះលោកក៏មានឈាមជ័រជាអាស៊ី ២៥% ដែរ ។ កាន់តែរំភើបចិត្តនោះ លោកក៏បានសរសេរភាសាខ្មែរឆ្លើយតបខមមិនរបស់អ្នកគាំទ្រ ថែមទៀតផងថា «ខ្ញុំក៏ជាជនជាតិកម្ពុជាដែរ ស្រឡាញ់ » ។
ការយល់ច្រលំថាលោកជាកូនបារាំងកាត់ថៃនោះ គឺដោយសារតែ លោក Antoine Pinto បានប្ដូរទីលំនៅទៅរស់នៅប្រទេសថៃតាំងតែពីក្មេងៗ ជាមួយក្រុមគ្រួសារ រហូតលោកអាចនិយាយភាសាថៃបានយ៉ាងល្អ ។ ដោយក្នុងនោះដែរ តារាសម្ដែង និង កីឡាករសង្ហារូបនេះ មានបងប្អូនចំនួន ៣ នាក់ លោកជាកូនទី ២ ក្នុងគ្រួសារ ។
គួរឱ្យដឹងថាការបកស្រាយទទួលស្គាល់ការពិតនូវដើមកំណើតខ្លួនឯងថាខ្លួនមានឈាមជ័រជាជនជាតិខ្មែរ ទោះត្រឹមតែតិចតួច បានធ្វើឱ្យអ្នកគាំទ្ររបស់លោក ជាពិសេសប្រជាជនកម្ពុជាមានអារម្មណ៍រំភើប និងស្រលាញ់គាំទ្ររឹតតតែខ្លាំងមួយកម្រិតទៀត៕
