មនុស្សស្រី ទោះបីនាងស្រស់ស្អាតយ៉ាងណាក៏ដោយ ក៏នាងនៅតែដល់ពេលមួយត្រូវបាក់សម្រស់ ប្រៀបបាននឹងផ្ការីកស្រស់ត្រកាល តែក៏នឹងរុះររោយទៅនៅពេលណាមួយ ចំណែកមនុស្សស្រីក៏ចឹងដែរ តែសូមស្វាមីទាំងឡាយចងចាំផងថា នាងបាក់សម្រស់ ទោះយ៉ាងណា នាងក៏នឹងចាស់ជរាវ័យទៅ មិនអាចរក្សាសម្រស់ឱ្យនៅស្រស់ស្អាត ដូចស្រីៗក្មេងៗដែលទើបពេញវ័យនោះឡើយ។
ក្នុងនាមជាប្ដី មិនថាប្រពន្ធអ្នកបាត់បង់សម្រស់យ៉ាងណា ទោះនាងចាស់ទៅបែបណា ឬមិនថានាងក្លាយជាបែបណាទេ តែក្លាយជាប្ដីប្រពន្ធនឹងគ្នាហើយ នាងជាប្រពន្ធរបស់អ្នកហើយ អ្នកមិនគួរបោះបង់ប្រពន្ធចោល ដោយត្រឹមតែហេតុផលនាងចាស់នោះទេ មិនមែនលួចក្បត់នាងទៅមានស្រីថ្មី ព្រោះតែនាងលែងស្អាតដូចស្រីក្មេងៗនោះឡើយ ព្រោះទោះជាយ៉ាងណាក៏ដោយ ក៏នាងជាស្ត្រីដែលអ្នកជ្រើសរើស នាងជាមនុស្សដែលចាប់ផ្ដើមសាងគ្រួសារជាមួយនឹងអ្នក អ្វីដែលសំខាន់ គឺនាងជាអ្នកលះបង់គ្រប់យ៉ាងនៃជីវិតពាក់កណ្ដាលរបស់នាងដើម្បីអ្នក ជាពិសេសគឺ នាងជាអ្នកបង្កើតកូន បន្តពូជពង្សវង្សត្រកូលឱ្យអ្នក។
កុំក្បត់ប្រពន្ធព្រោះតែនាងបាក់សម្រស់ កុំបោះបង់នាងព្រោះតែអ្នកមានបានថ្កើងថ្កានយសសក្តិ សូមចាំថា ប្រពន្ធក៏មានចំណែកជួយជ្រោមជ្រែង លើករាសីអ្នកឱ្យខ្ពង់ខ្ពស់ និងបានលូតលាស់ បើគ្មាននាងជាប្រពន្ធ អ្នកក៏មិនអាចបានល្អប្រសើរដែរ។ មនុស្សស្រីនាងប្រែជាចាស់ជាងវ័យ រូបសម្រស់នាងលែងដូចមុន ក៏ព្រោះតែមានចំណែកអ្នក ទើបនាងព្រមលះបង់ភាពជាយុវវ័យរបស់នាងដើម្បីអ្នក។ សូមកុំបោះបង់ប្រពន្ធកូនចោល ព្រោះថា ប្ដីប្រពន្ធ គឺប្ដីប្រពន្ធមួយជីវិត មិនមែនត្រឹមតែមួយថ្ងៃពីរថ្ងៃទេ … ត្រូវចេះគិត យល់ចិត្ត ខិតខំប្រឹងប្រែងជាមួយគ្នា៕
អត្ថបទ ៖ ភី អេក / ក្នុងស្រុករក្សាសិទ្ធិ