ពិតជាគួឱ្យភ្ញាក់ផ្អើលណាស់ ថ្មីៗនេះប្រាសាទបុរាណដែលហ៊ុមព័ទ្ធដោយឫស្សី ខុសប្លែកពីប្រាសាទដទៃត្រូវបានគេរកឃើញ និងល្បីពេញបណ្តាញសង្គម មិននឹកស្មានថាប្រទេសកម្ពុជាមានប្រាសាទដែលមានទស្សនីយភាពធម្មជាតិប្លែកស្រស់ស្អាតបែបនេះសោះ។
ប្រាសាទដែលមានលក្ខណៈបាក់បែកស្ទើរទាំងស្រុង ដោយគេឃើញមាននៅសល់តែតួទ្វារប្រាង្គប្រាសាទប៉ុណ្ណោះមួយនេះ ត្រូវគេស្គាល់ថាមានឈ្មោះថា ប្រាសាទទទឹងថ្ងៃ ជាប្រាសាទមួយដែលកសាងឡើងនៅស.វ ទី ១០ ធ្វើអំពីថ្មភក់ និងឥដ្ឋ ។ ប្រាសាទនេះជាប្រាសាទស្ថិតនៅក្នុងខេត្តសៀមរាប ដែលមានលក្ខណៈខុសប្លែកពីប្រាសាទដទៃនៅខេត្តសៀមរាបដែលសំបូរដើមឈើតូធំ តែប្រាសាទតូចមួយនេះបែរជាសំបូរដោយដើមឫស្សីទៅវិញ ដែលវាជាទិដ្ឋភាពមួយធ្វើឱ្យយើងមានអារម្មណ៍ប្លែកពីប្រាសាទនានាខ្លាំងមែនទែន។
តែគួរឱ្យយសោកស្ដាយ ដែលប្រាសាទនេះមិនសូវមានទេសចរទៅលេងដល់ទេ ទាំងទេសចរជាតិ និងអន្តរជាតិ។ តែប្រាសាទនេះពិតជាប្លែក និងស្រស់ស្អាតណាស់សម្រាប់អ្នកដែលចង់ថតរូបកម្សាន្ត ជាលក្ខណៈគូស្នេហ៍ រូប Pre-Wedding មុនរៀបការ ព្រោះទីនោះ មានប្លង់ស្អាតៗណាស់ ហើយការទៅលេងកម្សាន្តក៏ជាផ្នែកមួយដែលចូលរួមចំណែកផ្សព្វផ្សាយពីប្រាសាទដ៏ឯកោមួយនេះដល់ទេសចរឲ្យគេបានស្គាល់ផងដែរ។
គួរឱ្យដឹងផងដែរថា ប្រាសាទទទឹងថ្ងៃនេះមានទីតាំងស្ថិតនៅក្នុងភូមិគោកស្រុក ឃុំរលួស ស្រុកប្រាសាទបាគង ខេត្តសៀមរាប៕
រូបភាពពីអ្នកនាង Kong Chansreymom/ យស់ មករា
