យោងតាមគណនីផេករបស់ លោក ឃឹម ហ្វីណង់ ចៅហ្វាយស្រុកបន្ទាយស្រី បានបង្ហោះរូបប៉ុន្មានសន្លឹក ជាមួយនឹងខ្លឹមសារដ៏មានន័យ បង្ហាញពីសម្រស់នៃធម្មជាតិពណ៌បៃតង នៃទីស្រុកស្រែជនបទ បានធ្វើឱ្យមហាជនមានការស្រឡាញ់ ពេញចិត្តទៅនឹងទិដ្ឋភាពនេះយ៉ាងក្រៃលែង។ ដោយលោកចៅហ្វាយស្រុកបានសរសេរខ្លឹមសារដូចតទៅ ៖
តើ«សម្រស់»ពិតជាអាស្រ័យនៅលើក្រសែភ្នែករបស់អ្នកមើលមែនឬ? (Is “Beauty” really in the eye of the beholder?)
ថ្ងៃមុន ជួនជាចៃដន្យសុំផ្លូវអ្នកភូមិដើរវាងឆ្លងកាត់តាមក្រោយផ្ទះរបស់ពួកគាត់ ក៏បានពើបប្រទះនឹងទេសភាពដ៏ស្រស់ត្រកាលប្រៀបបាននឹងផ្ទាំងគំនូរគូរដោយដៃកសិករមួយនេះ ដែលកំពុងតែលាក់ខ្លួនពួនកាយ ដាច់ឆ្ងាយពីភ្នែកអ្នកដទៃដូចជាខ្ញុំ។ រំពេចនោះ ខ្ញុំមិនអាចទ្រាំនឹងមិនសួរខ្លួនឯងបានថា៖ “តើភាពស្រស់ស្អាត និងការអោយតម្លៃទៅលើអ្វីមួយ គឺពិតជាស្ថិតនៅលើក្រសែភ្នែករបស់អ្នកមើលវាមែនទេ?”
សម្រាប់អ្នកព្រះដាក់ នៅទីនេះគ្រាន់តែផ្នែកខាងក្រោយមួយនៃភូមិ និងជាកន្លែងដែលគេមិនសូវចាប់អារម្មណ៍ ឬឱ្យតម្លៃដូចផ្នែកខាងមុខដែលជាប់នឹងផ្លូវធំឡើយ។ សម្រាប់ខ្ញុំ កន្លែងនេះមានភាពឥតខ្ចោះសម្រាប់ឱ្យអ្នកទីក្រុង”មកដកដង្ហើម” និងអាចក្លាយជាគោលដៅទេសចរណ៍ក្នុងក្តីសុបិន្តរបស់អ្នកស្រលាញ់ភាពស្ងប់ស្ងាត់ និងទេសចរណ៍តាមបែបជនបទ។
បច្ចុប្បន្ននេះ ជីវភាពរបស់ពួកគាត់អាស្រ័យលើការចិញ្ចឹមមាន់ និងកង្កែប ផ្គត់ផ្គង់ឱ្យទៅអ្នកខាងមុខ ដើម្បីធ្វើជាមាន់អាំង និងកង្កែបបោក លក់ទៅឱ្យភ្ញៀវទេសចរដែលឆ្លងកាត់ភូមិព្រះដាក់។ ខ្ញុំចេះតែឆ្ងល់ថា ចុះបើមាន់ក៏មាន កង្កែបក៏មាន ហេតុអ្វីមាន់អាំងកង្កែបបោកមិនអាចអាំងនៅទៅនេះបាន? ហើយបើបានអង្គុយហូបនៅហ្នឹងកន្លែងផ្ទាល់ទៀត ព្រមទាំងអាចគយគន់បណ្តែតអារម្មណ៍មើលទេសភាពវាលស្រែធំល្វឹងល្វើយពណ៌បៃតងខ្ចី មិនដឹងមានន័យយ៉ាងណាទេ…សូម្បីតែហូបនំបញ្ចុកព្រះដាក់ដ៏ល្បីនៅទីនេះក៏សមនឹងបរិយាកាសខ្លាំងណាស់ដែរ។
និយាយដោយត្រង់ បើអ្នកភូមិរៀបឱ្យមាន”ផ្ទះស្នាក់ – Homestay”នៅក្នុងតំបន់នេះ ខ្ញុំប្រហែលជាអតិថិជនទីមួយហើយមើលទៅ ជាពិសេសនៅក្នុងរដូវវស្សាតែម្តង។ ស្រមៃពេលយប់ស្ងាត់ក្រោយពេលភ្លៀងធ្លាក់ ស្តាប់កូនក្អាត់យំមុនពេលចូលគេង ភ្ញាក់ឡើងដោយសំឡេងមាន់រងាវ មើលព្រះអាទិត្យរះនៅលើវាលស្រែដ៏ស្រស់ត្រកាល និងដកដង្ហើមស្រូបយកខ្យល់បរិសុទ្ធនាពេលព្រឹកព្រលឹម ជីវិតប្រហែលជាមានន័យខ្លាំងណាស់។ ❤️
#ទេសចរណ៍ជនបទ | #ព្រះដាក់ភូមិគំរូ
សូមអញ្ជើញទស្សនារូបភាពត្រជាក់ភ្នែកនៅខាងក្រោមនេះ ៖
ប្រភព ៖ ហ្វេសប៊ុគផេក ឃឹម ហ្វីណង់ – Khim Finan