ក្រសួងធនធានទឹក និងឧតុនិយម បានចេញសេចក្ដីប្រកាសអំពីស្ថានភាព អាកាសធាតុនៅកម្ពុជា នាព្រឹកថ្ងៃទី ២៨ កក្កដា ២០២០នេះ ដើម្បីក្រើនរំឭកដល់បងប្អូនប្រជាពលរដ្ឋទូទាំងប្រទេសឱ្យបានជ្រាបថា ចាប់ពីថ្ងៃទី២៩ ខែកក្កដា ២០២០ រហូតដល់ថ្ងៃទី០៤ ខែសីហា ២០២០ ខាងមុខនេះ កម្ពុជានឹងមានភ្លៀងធ្លាក់ពីកម្រិតតិចទៅច្រើន។
តាមរយៈការប្រែប្រួលជាបន្ដបន្ទាប់ នៃស្ថានភាពអាកាសធាតុនេះ សង្កេតឃើញថា ខ្យល់មូលសុងនិរតីបក់ក្នុងកម្រិតបង្គួរមកលើប្រទេសកម្ពុជា ខណៈប្រព័ន្ធសម្ពោធទាបបានអូសបន្លាយលើប្រទេសថៃ ឡាវ និងវៀតណាម។
ស្ថានភាពបែបនេះបានធ្វើឱ្យ ៖
១. នៅតាមបណ្ដាខេត្តនៅតាមតំបន់ទំនាបកណ្ដាល
– សីតុណ្ហភាពអប្បបរមា មានពី ២៦-២៨ អង្សា
– សីតុណ្ហភាពអតិបរមា មានពី ៣២ – ៣៤អង្សា
ភ្លៀងនឹងអាចធ្លាក់រាយប៉ាយ ជាមួយនឹងបរិមាណពីមធ្យមទៅច្រើន ក្នុងនោះក៏មានផ្នែកខ្លះអាចមានភ្លៀងធ្លាក់ខ្លាំង។
២. បណ្ដាខេត្តនៅតំបន់ជួរភ្នំដងរែក និងខ្ពង់រាបឦសាន
– សីតុណ្ហភាពអប្បបរមា មានពី ២៤ – ២៦ អង្សា
– សីតុណ្ហភាពអតិបរមា មានពី ៣០ – ៣២ អង្សា
នឹងអាចមានភ្លៀងធ្លាក់រាយប៉ាយ នៅក្នុងកម្រិតពីមធ្យម ទៅបង្គួរ ក្នុងនោះក៏មានផ្នែកខ្លះអាចមានភ្លៀងធ្លាក់ច្រើន។
៣. បណ្ដាខេត្តនៅតំបន់មាត់សមុទ្រ
– សីតុណ្ហភាពអប្បបរមា មានពី ២៤ – ២៦ អង្សា
– សីតុណ្ហភាពអតិបរមា មានពី ៣០ – ៣២ អង្សា
នឹងអាចមានភ្លៀងធ្លាក់រាយប៉ាយនៅក្នុងកម្រិតពីតិច ទៅបង្គួរ។
អាស្រ័យលើស្ថានភាពធាតុអាកាសដូចនេះ សូមសាធារណជន ទាំងអស់ជ្រាបជាដំណឹង និងសូមប្រុងប្រយ័ត្នចំពោះបាត់ភូតផ្គរ រន្ទះ ខ្យល់កន្ត្រាក់៕
