១០ គន្លឹះហាត់ខួរក្បាល ដើម្បីកាត់បន្ថយភាពភ្លេចភ្លាំង
ភ្លេចបន្តិចបន្តួចជារឿងធម្មតា។ យើងងាយភ្លេចកូនសោឡាន ឯកសារ ឬឈ្មោះនរណាម្នាក់។ នេះមិនមែនធ្វើដោយចេតនាទេ។ ពេលចាស់ទៅ ខួរក្បាលអាចដំណើរការយឺតជាង។ តើអាចថែវាឱ្យបានយូរជាងនេះទេ? គន្លឹះខាងក្រោមអាចមានប្រយោជន៍។
១. ប្រើដៃដែលមិនទម្លាប់
បើអ្នកប្រើដៃស្តាំ ព្យាយាមប្រើដៃឆ្វេងម្តងម្កាល ពេលញ៉ាំបាយ សរសេរ ឬចាប់របស់។ ដំបូងពិបាក តែអនុវត្តទៅនឹងធូរ។ គោលបំណងគឺឱ្យខួរក្បាលធ្វើការខុសពីទម្លាប់ចាស់។
២. ធ្វើកិច្ចការខ្លះដោយបិទភ្នែក
យើងធ្វើរឿងប្រចាំថ្ងៃដោយមិនគិត។ ព្យាយាមធ្វើអ្វីខ្លះដោយបិទភ្នែក ដូចជាដាក់ដបទឹកលើតុ ឬរកកន្សែងក្នុងបន្ទប់ទឹក។ ការប៉ះវត្ថុនឹងបញ្ជូនសញ្ញាថ្មីទៅខួរក្បាល។
សុវត្ថិភាព៖ កុំបិទភ្នែកពេលដើរជណ្តើរ ចម្អិនភ្លើង ឬកន្លែងមានគ្រោះថ្នាក់។
៣. ប្តូរទម្លាប់ពេលព្រឹក
ភាពថ្មីថ្មោងជួយឱ្យខួរក្បាលប្រុងប្រយ័ត្ន។ មិនចាំបាច់ធ្វើរឿងស្មុគស្មាញទេ។ សាកស្លៀកពាក់ក្រោយបាយព្រឹក រត់តាមផ្លូវផ្សេង ឬមើលអ្វីផ្សេងជំនួសព័ត៌មានព្រឹក។
៤. មើលរបស់ធម្មតាតាមមុំថ្មី
យើងមើលអ្វីៗតាមទិសដដែល។ សាកដាក់រូបថត ឬប្រតិទិនបញ្ច្រាស ប្តូរទីតាំងនាឡិកា ឬពាក់នាឡិកាដៃម្ខាងទៀត។ ពេលមើល ខួរក្បាលត្រូវផ្តោតឡើងវិញ ដើម្បីយល់រូបនោះ។
៥. ហាត់ស្គាល់កាក់ដោយការប៉ះ
ដូចមនុស្សពិការភ្នែកអានអក្សរប៉ះ អ្នកក៏អាចហាត់ញាណប៉ះបាន។ យកកាក់ខុសប្រភេទ រួចព្យាយាមស្គាល់ដោយដៃ មិនមើល។ អាចហាត់ពេលរង់ចាំខ្លីៗ មិនមែនពេលបើកបរ។
៦. សាកអាហារថ្មីៗ
បើញ៉ាំម្ហូបដដែលរាល់ដង សូមប្តូរខ្លះ។ ក្លិន និងរសជាតិថ្មីជួយឱ្យខួរក្បាលទទួលព័ត៌មានថ្មី។ សាកម្ហូបថ្មីនៅភោជនីយដ្ឋាន ឬប្តូរគ្រឿងផ្សំនៅផ្ទះ។
៧. អានឱ្យលឺៗ
បើមានឱកាស សូមអានខ្លះឱ្យលឺ។ វាអាចយូរជាងអានក្នុងចិត្ត តែជួយឱ្យខួរក្បាលប្រើទាំងការមើល ការនិយាយ និងការស្តាប់ក្នុងពេលតែមួយ។ ស្តាប់សៀវភៅជាសំឡេងក៏មានប្រយោជន៍ដែរ។
៨. ប្រើល្បិចចងចាំ (mnemonic)
Mnemonic គឺវិធីច្នៃប្រឌិតដើម្បីចងចាំបញ្ជី។ ឧទាហរណ៍ ឃ្លាដើម្បីចងចាំឈ្មោះភព។ វិធីនេះជួយភ្ជាប់ព័ត៌មានថ្មីទៅនឹងអ្វីដែលចាំបានហើយ។
៩. ចិញ្ចឹមខួរក្បាលដោយអាហារ
ញ៉ាំអាហារដែលមានវីតាមីន និងខ្លាញ់ល្អគ្រប់គ្រាន់។ អាហារដែលគេនិយាយថាល្អដល់ខួរក្បាលរួមមានគ្រាប់ធញ្ញជាតិ ប្លូប៊ឺរី ស៊ុត ផ្កាខាត់ណាខៀវ ផ្លែបឺរ រមៀត និងប្រេងដូងតិចៗ។
១០. ចំណាយពេលជាមួយមនុស្ស
ការជជែកជាមួយគេធ្វើឱ្យខួរក្បាលផ្ញើ និងទទួលព័ត៌មាន។ និយាយជាមួយមនុស្សខុសពីខ្លួន កាន់តែបានគំនិតថ្មី។ សាកសួរនាំអ្នកលក់ ជំនួសការទិញតែតាមម៉ាស៊ីន។
គន្លឹះបន្ថែម៖ ប្រើញាណច្រើនក្នុងពេលតែមួយ
ធ្វើសកម្មភាពដែលប្រើភ្នែក ត្រចៀក ដៃ និងក្លិនជាមួយគ្នា ដូចជាថែសួន ធ្វើម្ហូប ឬជ្រើសផ្លែឈើនៅផ្សារ។ ហ្គេមខ្លះក៏អាចហាត់ការផ្តោតបាន បើមិនលេងយូរពេក។
តើអ្នកនឹងសាកបញ្ចូលគន្លឹះណាមួយទៅក្នុងទម្លាប់ប្រចាំថ្ងៃ?
ប្រភព៖ Bright Side