កាលពីថ្ងៃពុធ ក្រុមហ៊ុន NPC International ដែលជាក្រុមហ៊ុនអាជីវកម្មដ៏ធំរបស់ភោជនីយដ្ឋាន Pizza Hut មានចំនួន ១២០០កន្លែង និងភោជនីយដ្ឋាន Wendy មានចំនួន ៤០០កន្លែង ដែលមានមូលដ្ឋានធំនៅរដ្ឋ Kansas បានដាក់ពាក្យទៅជំពូកទី ១១ ដើម្បីប្រកាសពីភាពក្ស័យធន ជាមួយនឹងបំណុលដល់ទៅ ១ពាន់លានដុល្លា។
គួរបញ្ជាក់ផងដែរថា យីហោសិទ្ធិអាជីវកម្មនេះផ្តល់ការងារដល់កម្មករចំនួន ៣៦.០០០ នាក់នៅទូទាំងរដ្ឋចំនួន ៣០ ប៉ុន្តែ NPC International និយាយថា ខ្លួនរំពឹងថានឹងរក្សាគ្រប់ទីតាំងទាំងអស់ខណៈពេលដែលក្រុមហ៊ុននេះធ្វើការកាត់បន្ថយបំណុល និងចរចាជាមួយម្ចាស់ដៃគូរបស់ខ្លួន។
បច្ចុប្បន្ន NPC International បើដំណើរការហាង Pizza Hut ត្រឹមតែ១៧% និងហាងWendy ត្រឹមតែ៦%ប៉ុណ្ណោះ នៅទូទាំងសហរដ្ឋអាមេរិក។
បន្ថែមពីនេះ NPC International ក៏បានឱ្យដឹងថា ដោយសារតែបញ្ហានៃការរីករាលដាលនៃជំងឺ Covid-១៩ បណ្ដាលឱ្យរងផលប៉ះពាល់ដល់ ការកើនឡើងនៃតម្លៃម្ហូបអារហារ និងថ្លៃកម្មករកើនឡើង ជាមួយនឹងចំណូលដែលបានមកតិចតួចបំផុត។
គួរបញ្ចាក់ផងដែរថា ក្រុមហ៊ុន NPC International ជាក្រុមហ៊ុនចុងក្រោយដែលបានដាក់ពាក្យក្ស័យធនទៅជំពូកទៅ១១ បន្ទាប់ពី ក្រុមហ៊ុន Chuck E. Cheese and Peter Piper Pizza ក៏បានប្រកាសក្ស័យធនដែរ។
ជាមួយគ្នានេះក៏មានក្រុមហ៊ុនមួយចំនួនធំទៀតដែលបានក្ស័យធនដូចជា ក្រុមហ៊ុនយក្ស ផ្នែកជួល Hertz ប្រកាសក្ស័យធនកាលពីខែមុន ជាមួយនឹងបំណុលប្រហែល ១៩ ពាន់លានដុល្លា។ យីហោសម្លៀកបំពាក់ J. Crew
និងហាងលក់ទំនិញ Neiman Marcus និង JCPenney សុទ្ធតែប្រកាសក្ស័យធនកាលពីខែមេសា៕
ប្រភព ៖ Daily Mail