ព្រឹកថៃ្ងអង្គារ ៧កើត ខែពិសាខ ឆ្នាំជូត ទោស័ក ព.ស.២៥៦៣ ត្រូវនឹងថ្ងៃទី២៨ ខែមេសា ឆ្នាំ២០២០ យោងតាមលិខិតរបស់ក្រសួងវប្បធម៌ និងវិចិត្រសិល្បៈ ក្រុមការងារខេត្តដឹកនាំដោយ លោកជំទាវ ខាំ សុភាព អភិបាលរងខេត្ត អញ្ជើញចុះទៅសម្រុះសម្រួល និងចរចារជាមួយម្ចាស់ផ្ទះបុរាណសសរ១០០ ស្ថិតនៅភូមិកណ្តុរ ឃុំឆ្លូង ស្រុកឆ្លូង។
ម្ចាស់ផ្ទះស្នើសុំរុះរើដោយហេតុថាផ្ទះនេះទ្រុឌទ្រោម ព្រោះមានអាយុកាលរាប់រយឆ្នាំមកហើយ និងម្យ៉ាងទៀតដីនេះគាត់បានចែកទៅឱ្យកូនផ្សេងទៀតរួចហើយ។ ជាគោលការណ៍ក្រសួងពុំអនុញ្ញាតឱ្យរុះរើទេ តែម្ចាស់ផ្ទះមានសិទ្ធជួសជុល ដោយគោរពទៅតាមរចនាបថដើម។ ប៉ុន្តែបើម្ចាស់ផ្ទះរុះរើក្រសួងស្នើសុំទិញក្នុងតម្លៃសមស្រប ដើម្បីក្រសួងយកមកធ្វើនៅវិហាររកាកណ្តាល (ត្រូវបានចុះបញ្ជីជាបេតិភ័ណ្ឌវប្បធម៌ជាតិរួចហើយ) ក្នុងក្រុងក្រចេះវិញ។
យ៉ាងណាមិញ យោងតាមការបញ្ជាក់ជាថ្មីដើម្បីលម្អិតគឺ ផ្ទះបុរាណនេះត្រូវរុះរើ និងសាងសង់ឡើងវិញ ក្នុងទីតាំងបរិវេណវិហារបុរាណវត្តរកាកណ្តាលស្ថិតក្នុងក្រុងក្រចេះ ទុកសម្រាប់សាធារណៈជនចូលទស្សនា៕
ប្រភព ៖ Marady Tol