ប្រទេសកម្ពុជាយើង កាលពីសម័យុនបានបាត់ទឹកដិជាច្រើនដល់ប្រទេសជិតខាងជុំវិញ ដែលរួមដូចជាខ្មែរលើ ឬខ្មែរសុរិន្ទទឹកដីមួយភាគបានទៅលើប្រទេសថៃ ឯខ្មែរកម្ពុជាក្រោម មួយប៉ែកធំបានទៅលើប្រទេសវៀតណាម។
នៅក្នុងនោះដែរ បើទោះបីជាខ្លួនត្រូវឃ្លាតឆ្ងាយព្រំប្រទល់សីមា ក្លាយទៅជាប្រទេសដទៃ ឈាមជ័រជាខ្មែរ បេះដូងជាខ្មែរនៅតែមាន ដោយប្រជាជន និងកូនចៅជំាន់ក្រោយដែលមានដើមកំណើតជាខ្មែរនៅតែថែរក្សាអក្សរសាស្រ្ត វប្បធម៌ និងទំនៀមទម្លាប់ខ្មែរដដែល។
នៅក្នុងនោះជារឿយៗគេតែងតែឃើញថា ប្រជាជនខ្មែរកម្ពុជាក្រោមដែលស្ថិតនៅលើទឹកដីវៀតណាមរមែងតែងតែរៀបចំសកម្មភាពទាក់ទងនឹងប្រពៃណីខ្មែរជាច្រើនទាំងសិល្បៈចម្រៀង ពិធីបុណ្យសាសនា និងកម្មវិធីជាប្រពៃណីខ្មែរជាដើម សុទ្ធសឹងតែតាមក្បួនខ្នាតខ្មែរទាំងអស់ពិសេសគឺការរៀបចំមង្គលការតែម្តង។
ដោយភាគច្រើនពិធីមង្គលការ ការស្លៀកពាក់គឺបែបប្រពៃណីខ្មែរ ដែលជាការបញ្ជាក់អំពីអត្តសញ្ញាណប្រពៃណីរបស់បងប្អូនខ្មែរនៅលើទឹកដីកំណើតកម្ពុជាក្រោម ដែលមានទឹកចិត្តចូលរួមថែរក្សាប្រពៃណីបានគង់វង្សតរៀងទៅមិនឱ្យបាត់បង់ឡើយ៕
