ការសម្តែងរបាំបុរាណ« រឿង ព្រះអនរុទ្ធព្រះនាងឱស្សា »ដែលនឹងធ្វើការលើកសម្តែងជូនប្រិយមិត្ត ពិសេសកូនខ្មែរបានទស្សនា នៅថ្ងៃទី ២៧ ២៨ និង ២៩ ខែកុម្ភៈ ឆ្នាំ ២០២០ នៅសាលសន្និសីទចតុម្មុខ ត្រូវបានក្រុមការងារប្រកាសជាផ្លូវការនៅថ្ងៃនេះថា នឹងធ្វើការពន្យារពេល។
ការពន្យារពេលសម្តែងរបាំនេះជាបណ្ដោះអាសន្ន ដែលធ្វើឡើងយ៉ាងប្រថុចញ៉ុចបែបនេះ ត្រូវបានក្រុមការងារសម្តែងរបាំបានឱ្យដឹងថាដោយសារមានការផ្ទុះឡើងនូវមេរោគកូវីដ-១៩ ហើយការពន្យាពេលនេះគឺជាការចូលរួមចំណែកក្នុងការទប់ស្កាត់ និងការពារសុវត្ថិភាពរបស់បងប្អូនប្រជាពលរដ្ឋកម្ពុជា។
គួរឱ្យដឹងផងដែរថា សំបុត្រនៃការសម្តែងនេះ បានដាក់លក់តាំងពីថ្ងៃទី ១៤ ខែកុម្ភៈ ឆ្នាំ ២០២០ ដោយសំបុត្រមានលក់ចាប់ពីម៉ោង ១១ ដល់ម៉ោង ៦ល្ងាច នៅសាលសន្និសីទចតុម្មុខ មានតម្លៃ100,000 រៀល / 40,000 រៀល និង 20,000 រៀល ហើយថែមទាំងត្រូវបានលក់អស់គ្មានសល់ត្រឹមតែរយៈបេលប៉ុន្មានសប្តាហ៍ប៉ុណ្ណោះ ព្រោះតែមានការគាំទ្រជាច្រើនពិអ្នកទស្សនាដែលស្រលាញ់សិល្បៈវប្បធម៌ខ្មែរ។
ចំពោះព័ត៌មានលម្អិតជាបន្តបន្ទាប់ និងការសម្តែងនឹងធ្វើឡើងជាថ្មីនៅក្នុងកាលបរិច្ឆេទណានោះ « ក្នុងស្រុក » នឹងធ្វើការជម្រាបជូននាពេលក្រោយ៕
