ថវិកាបន្ថែមនឹងជួយដល់ក្លិប Championship, League One និង League Two ព្រមទាំងគម្រោងអភិវឌ្ឍហេដ្ឋារចនាសម្ព័ន្ធ
ក្លិបទាំងអស់ក្នុងក្របខណ្ឌ Premier League បានបោះឆ្នោតជាឯកច្ឆន្ទអនុម័តលើផែនការផ្តល់ថវិកាបន្ថែមសរុប ១.៥ ពាន់លានផោន ដល់ក្លិបនៅក្នុងលីគអាជីពរបស់អង់គ្លេស (EFL) ក្នុងរយៈពេល ១០ ឆ្នាំខាងមុខ។ នេះបើយោងតាមការចុះផ្សាយរបស់ The Guardian។
បើសំណើនេះត្រូវបានអនុម័តជាផ្លូវការ វានឹងផ្តល់ការគាំទ្រផ្នែកហិរញ្ញវត្ថុកាន់តែច្រើនដល់ក្លិបនៅក្នុង Championship, League One និង League Two ដែលជាលីគទី២ ទី៣ និងទី៤ នៃប្រព័ន្ធបាល់ទាត់អង់គ្លេស។
ផែនការនេះក៏រួមបញ្ចូលការបង្កើតមូលនិធិពិសេស ដើម្បីជួយដល់ក្លិបដែលកំពុងប្រឈមបញ្ហាហិរញ្ញវត្ថុ និងផ្តល់ថវិកាសម្រាប់ការកែលម្អ និងអភិវឌ្ឍហេដ្ឋារចនាសម្ព័ន្ធរបស់ក្លិបនានាផងដែរ។
ដើម្បីផ្តល់ប្រភពថវិកាសម្រាប់គម្រោងនេះ ក្លិបនៅ Premier League បានយល់ព្រមដំឡើងអត្រាកម្រៃ (Levy) លើការផ្ទេរកីឡាករ ពី ៤% ទៅ ៦%។
ទោះបីជាភាគីទាំងពីរមានទំនុកចិត្តថាអាចឈានដល់កិច្ចព្រមព្រៀងក៏ដោយ ក៏ EFL មិនទាន់បានពិនិត្យលើសំណើនេះនៅឡើយ ហើយក៏មិនទាន់មានការអនុម័តជាផ្លូវការនោះដែរ។