កម្ពុជា តាមរយៈគណៈកម្មាធិការជាតិអូឡាំពិក (NOCC) បានសម្រេចចិត្តជាបន្ទាន់ ក្នុងការបញ្ជូនប្រតិភូកីឡារបស់ខ្លួន ដែលកំពុងចូលរួមការប្រកួតស៊ីហ្គេម លើកទី ៣៣ ឆ្នាំ ២០២៥ នៅប្រទេសថៃ ឱ្យត្រឡប់មកមាតុប្រទេសវិញ ដោយសារហេតុផលសុវត្ថិភាពជាចម្បង ដែលមិនអាចបន្តនៅបាន។
ជុំវិញបញ្ហានេះ លោក វ៉ាត់ ចំរើន អគ្គលេខាធិការ NOCC ទើបតែបានផ្ញើលិខិតផ្លូវការទៅកាន់លោក Dato’ Seri Chaiyapak Siriwat នាយកប្រតិបត្តិសហព័ន្ធកីឡាអាស៊ីអាគ្នេយ៍ នៅថ្ងៃពុធ ទី ១០ ខែធ្នូនេះ ដើម្បីជម្រាបពីការដកខ្លួនរបស់ប្រតិភូកីឡាកម្ពុជា ចេញពីការប្រកួតស៊ីហ្គេម លើកទី ៣៣ ជាបន្ទាន់នេះ។
លោក ចំរើន បានបញ្ជាក់នៅក្នុងលិខិតនេះថា៖ «ក្នុងនាមគណៈកម្មាធិការអូឡាំពិកជាតិកម្ពុជា ខ្ញុំសូមអភ័យទោស ដែលជម្រាបជូនលោកថា ដោយសារតែការព្រួយបារម្ភយ៉ាងខ្លាំង និងសំណើពីក្រុមគ្រួសារអត្តពលិករបស់យើង ឱ្យសាច់ញាតិរបស់ពួកគេ ត្រឡប់មកផ្ទះវិញភ្លាមៗ។ NOCC ត្រូវតែដកគណៈប្រតិភូទាំងអស់របស់យើងចេញ ហើយរៀបចំឱ្យពួកគេត្រឡប់មកកម្ពុជាវិញជាបន្ទាន់ ដោយសារហេតុផលសុវត្ថិភាព»។
លោកបានសង្កត់ធ្ងន់ថា៖ «ការសម្រេចចិត្តនេះ មិនមែនធ្វើឡើងដោយងាយៗនោះទេ។ យើងសូមកោតសរសើរយ៉ាងខ្លាំង ចំពោះបដិសណ្ឋារកិច្ច ភាពកក់ក្តៅ និងស្មារតីកីឡា ដែលបានផ្តល់ជូនអត្តពលិករបស់យើង ដោយគណៈកម្មាធិការរៀបចំការប្រកួតស៊ីហ្គេមថៃ (THASOC) និងគណៈកម្មាធិការជាតិអូឡាំពិកថៃ (NOCT) ពេញមួយការស្នាក់នៅរបស់ពួកគេ»។
ជាមួយគ្នានេះ លោក វ៉ាត់ ចំរើន បានសុំការអភ័យទោស ចំពោះភាពរអាក់រអួលណាមួយ សម្រាប់ការចាកចេញមុនកាលកំណត់របស់ប្រតិភូកីឡាកម្ពុជា ក្នុងព្រឹតត្តិការណ៍ស៊ីហ្គេមនេះ ដែលអាចបង្កឡើង ហើយកម្ពុជា នៅតែដឹងគុណចំពោះការយោគយល់ និងការគាំទ្ររបស់ លោក Dato’ Seri Chaiyapak Siriwat និងភាគីពាក់ព័ន្ធផ្សេងទៀត។
លោក វ៉ាត់ ចំរើន ដែលជារដ្ឋលេខាធិការក្រសួងអប់រំ យុវជន និងកីឡា ផងនោះ បានបញ្ជាក់ជាចុងក្រោយ នៅក្នុងលិខិតនេះថា៖ «យើងនឹងសម្របសម្រួលជាមួយការិយាល័យរបស់អ្នក ទាក់ទងនឹងការរៀបចំការចាកចេញ និងបែបបទចាំបាច់ណាមួយ។ សូមអរគុណចំពោះការយោគយល់ និងជំនួយរបស់អ្នក»។
គួរបញ្ជាក់ថា នៅពេលនេះ ប្រតិភូកីឡាកម្ពុជា ចំនួន ៧ ប្រភេទ បាននឹងកំពុងស្ថិតនៅប្រទេសថៃ ក្នុងនោះមាន ហែលទឹក ជឺជីតស៊ូ តេក្វាន់ដូ (WT) បាល់ទាត់លើតុ កាយសម្ព័ន្ធ អត្តពលកម្ម និងម៉ូតូទឹក ចំណែកប្រភេទកីឡាចំនួន៦ទៀត រួមមានឃីកបុកស៊ីង កីឡាអេឡិចត្រូនិក ជិះសេះ គុនដាវ ទ្រីយ៉ាត្លុង និងកាយសម្ព័ន្ធមួយក្រុមនេះ មិនទាន់បានធ្វើដំណើរ ទៅប្រទេសថៃនៅឡើយទេ។
ចំពោះប្រតិភូកីឡាកម្ពុជា មានថ្នាក់ដឹកនាំ គ្រូបង្វឹក និងកីឡាករ កីឡាការិនី ដែលបានធ្វើដំណើរទៅដល់ប្រទេសថៃ កាលពីថ្ងៃទី ៨ និងថ្ងៃទី ៩ ខែធ្នូ នោះ បានបំពេញកាតព្វកិច្ចផ្លូវការតាមច្បាប់កីឡាអន្តរជាតិ តំណាងឱ្យកម្ពុជា ក្នុងនាមជាសមាជិករបស់អាស៊ានរួចហើយ តាមរយៈការចូលរួមពិធីគោរពទង់ជាតិ ក្នុងការប្រកួតស៊ីហ្គេម ឆ្នាំ ២០២៥ កាលពីថ្ងៃទី ៨ និងចូលរួមពិធីបើកជាផ្លូវការរបស់ព្រឹត្តិការណ៍នេះ កាលពីយប់ថ្ងៃទី ៩ ខែធ្នូ។
យ៉ាងណាក៏ដោយ ការបង្ខំចិត្តដកខ្លួនចេញពីការប្រកួតស៊ីហ្គេម លើកទី ៣៣ ត្រឹមពាក់កណ្តាលទី នៅថ្ងៃទី ១០ ខែធ្នូនេះ ដោយសារតែប្រតិភូកីឡាកម្ពុជា កាន់តែទទួលរងសម្ពាធខ្លាំង ចំពោះការស្នាក់នៅប្រទេសថៃ ទោះបីជា THASOC បានពង្រឹងការការពារសន្តិសុខ បានតឹងរឹង ទាំងការស្នាក់នៅសណ្ឋាគារ ព្រមទាំងការចេញទៅកន្លែងហ្វឹកហាត់ កន្លែងប្រកួត និងការត្រឡប់មកសណ្ឋាគារវិញក៏ដោយ។
ជាមួយគ្នានេះ អាណាព្យាបាលរបស់អត្តពលិកកម្ពុជា ដែលកំពុងស្នាក់នៅប្រទេសថៃ បានបង្ហាញការបារម្ភកាន់តែខ្លាំងដល់កូនក្មួយ និងសាច់ញាតិរបស់ពួកគាត់ បន្ទាប់ពីទទួលបានដំណឹងថា អាជ្ញាធរកីឡាថៃ (SAT) បានបើកការស៊ើបអង្កេតទៅលើឯកសណ្ឋានកីឡារបស់ប្រតិភូ និងក្រុមជម្រើសជាតិកម្ពុជា ដែលបានពាក់ទៅចូលរួមការប្រកួតកីឡាស៊ីហ្គេមនេះ ថាតើខុសទៅនឹងច្បាប់កីឡា និងការហាមឃាត់របស់ប្រទេសថៃ ឬយ៉ាងណា?។
បញ្ហានេះ បានកើតមានឡើង បន្ទាប់ពីអ្នកនិយមលេងបណ្តាញសង្គមរបស់ថៃ បានកត់សម្គាល់ឃើញថា ឯកសណ្ឋានក្រុមជម្រើសជាតិកម្ពុជា មានជាប់ Logo របស់ណាហ្គាវើលដ៍ (NAGAWORLD) នៅលើទ្រូងផ្នែកខាងស្តាំនៃឈុតកីឡានេះ ដោយពួកគេចាត់ទុកថា ជាឈ្មោះក្រុមហ៊ុនកាស៊ីណូដ៏ល្បីល្បាញ នៅប្រទេសកម្ពុជា។
ជុំវិញបញ្ហានេះ សារព័ត៌មាន Khaosod English របស់ថៃ បានដកស្រង់សម្ដី លោក Kongsak Yodmanee អភិបាលនៃអាជ្ញាធរកីឡាថៃ មកបញ្ជាក់ ដោយលោកបាននិយាយ កាលពីថ្ងៃទី ៩ ខែធ្នូ ថា អាជ្ញាធរកីឡាថៃ នឹងស៊ើបអង្កេតរឿងនេះ ជាបន្ទាន់ជាមួយនាយកដ្ឋានរដ្ឋបាលខេត្ត ក្រសួងមហាផ្ទៃ។
លោក Kongsak Yodmanee បានបញ្ជាក់តាមរយៈ Khaosod English បែបនេះថា៖ «ពួកគេត្រូវពិនិត្យឡើងវិញ នូវច្បាប់ថៃជាមុនសិន ដើម្បីកំណត់ថា តើនេះជាការផ្សាយពាណិជ្ជកម្ម ឬអត់ ដោយពិគ្រោះជាមួយអាជ្ញាធរផ្នែកច្បាប់ មុនពេលបន្តសកម្មភាពបន្ថែមទៀត។ កាស៊ីណូ ត្រូវបានហាមឃាត់ទាំងស្រុងនៅក្នុងប្រទេសថៃ»។
យ៉ាងណាក៏ដោយ ជុំវិញឯកសណ្ឋានប្រតិភូ និងក្រុមជម្រើសជាតិកម្ពុជា មានភ្ជាប់ឈ្មោះម្ចាស់ឧបត្ថម្ភ គឺ ណាហ្គាវើលដ៍ នេះ លោក ញ៉ាន សុខវិសាល នាយកបេសកកម្មកម្ពុជា ក្នុងព្រឹត្តិការណ៍ស៊ីហ្គេម ឆ្នាំ ២០២៥ នេះ បានបញ្ជាក់យ៉ាងខ្លីថា៖ «យើងប្រើអាវណាហ្គារាប់ឆ្នាំហើយ រហូតដល់កម្រិតអូឡាំពិក»។
តាមអ្វីដែលលោក ញ៉ាន សុខវិសាល បានបញ្ជាក់នេះ អាចបង្ហាញបានច្បាស់ហើយថា ពាក្យ NAGAWORLD នៅលើឯកសណ្ឋានប្រតិភូកីឡា និងក្រុមជម្រើសជាតិកម្ពុជា ត្រូវបានប្រើប្រាស់ជាច្រើនលើកមកហើយ ទាំងក្នុងការប្រកួតស៊ីហ្គេម ជាពិសេសឈានដល់ការប្រកួតកីឡាអូឡាំពិកអន្តរជាតិ ដែលជាព្រឹត្តិការណ៍កីឡាធំផុតរបស់ពិភពលោកទៅទៀត ប៉ុន្តែមិនឃើញមានអ្វីខុសទៅនឹងច្បាប់កីឡាទេ។
ចំណុចនេះ បានធ្វើឱ្យមហាជន មើលឃើញកាន់តែច្បាស់ពីចេតនាមិនល្អរបស់ម្ចាស់ផ្ទះថៃ ដែលព្យាយាមចាប់កំហុសរបស់កម្ពុជា ទាំងខុសរឿង ក្នុងគោលបំណងបំបាក់មុខកម្ពុជា នៅលើឆាកអន្តរជាតិ ដោយបានអូសទាញរឿងនយោបាយ មកពាក់ព័ន្ធនឹងកីឡា ទោះច្បាប់បញ្ញត្តិរបស់ស៊ីហ្គេម បានបញ្ជាក់ច្បាស់ពីបញ្ហានេះ ហើយការប្រថុយប្រឋានទៅចូលរួមស៊ីហ្គេម លើកទី ៣៣ របស់កម្ពុជា ក៏គោរពទៅតាមបទបញ្ញត្តិស៊ីហ្គេម ដែលសហព័ន្ធកីឡាអាស៊ីអាគ្នេយ៍ ទាំង១១ប្រទេស បានកំណត់ផងដែរ តែថៃ បែរជាធ្វើផ្ទុយពីគោលការណ៍នេះទៅវិញ។
ជាមួយគ្នានេះ នៅក្នុងពិធីបើកការប្រកួតស៊ីហ្គេម លើកទី ៣៣ កាលពីយប់ថ្ងៃអង្គារ ម្សិលមិញ ម្ចាស់ផ្ទះថៃ ក៏បានបង្កើតកំហុសឆ្គងចំនួន២ មកលើកម្ពុជាដែរ ទី ១ ការរត់អក្សរជាភាសាខ្មែរ នៅលើផ្ទាំងអេក្រង់ គឺពាក្យ «ជម្រាបសួរ» ខាងម្ចាស់ផ្ទះថៃ សរសេរខុស ទៅជា «ជាំរាបសួរ» វិញ។
ចំណែកចំណុចទី ២ ប្រអប់ភ្លើង LED ទាំង១១ ដែលតំណាងឱ្យប្រទេសទាំង១១ នៅក្នុងតំបន់អាស៊ាន គឺមានតែ LED ភ្លើងតំណាងឱ្យប្រទេសកម្ពុជា មួយទេ គ្មានភ្លើងបាញ់បំភ្លឺ រីឯ LED តំណាងឱ្យ ១០ ប្រទេសទៀត មានភ្លើងបាញ់បំភ្លឺទាំងអស់ ហើយនេះជាកំហុសចេតនា ច្រើនជាងអចេតនា ដោយសារតែថៃ ដែលតែងតែគិតមិនល្អ មកលើកកម្ពុជា។
នៅមានកំហុសឆ្គង និងភាពកម្សោយជាច្រើនទៀត ដែលបានកើតមានឡើង នៅក្នុងពិធីបើកការប្រកួតស៊ីហ្គេម កាលពីយប់មិញ ហើយប្រទេសវៀតណាម ឥណ្ឌូនេស៊ី និងសិង្ហបុរី សុទ្ធតែទទួលរងផលប៉ះពាល់ ជុំវិញការរៀបចំមិនបានល្អនេះ ហើយការដុតភ្លើងគប់ធំ មិនឆេះ មានតែផ្សែង វាជាហេតុការណ៍ដ៏ចម្លែក ដែលធ្វើឱ្យម្ចាស់ផ្ទះថៃខ្លួនឯង ទទួលរងភាពអាម៉ាស់ខ្លាំង រហូតលែងហ៊ានបាញ់កាំជ្រួចអបអរសាទរ ធ្វើឱ្យពិធីបើកស៊ីហ្គេមទាំងមូល ត្រូវបានបញ្ចប់ដោយភាពសោះអង្គើយ៕
