បើមនុស្សចាស់ក្នុងគ្រួសារធ្វើដូចខាងក្រោម នោះកូនគឺជាអ្នកដែលនឹងទទួលផលវិបាកទៅថ្ងៃមុខ ដូច្នេះបើអ្នកជាឪពុកម្តាយសូមជៀសវាងធ្វើរឿងទាំងនេះ ព្រោះវាបានបំផ្លាញអនាគតរបស់កូនជាទីស្រឡាញ់របស់យើង។
១.របៀបដែលយើងប្រព្រឹត្តចំពោះអ្នកក្រ៖ សព្វថ្ងៃសង្គមកាន់តែរីកចម្រើន គម្លាតរវាងអ្នកមាននិងអ្នកក្រកាន់តែឆ្ងាយគ្នា។ អ្នកខ្លះជោគជ័យខ្លាំង ហើយមានលុយច្រើន ចំណែកអ្នកខ្លះទៀតមានសម្រាប់តែហូបគ្រប់គ្រាន់ក្នុងមួយថ្ងៃ។ អ្នកខ្លះឈ្នះដោយការចាប់ផ្ដើម ខ្លះតស៊ូមិនប្រាកដថានឹងជោគជ័យ។ ប៉ុន្តែអ្វីដែលគួរឲ្យបារម្ភនោះ មិនមែនជាគម្លាតខាងរូបកាយទេ ប៉ុន្តែអាកប្បកិរិយារបស់យើងចំពោះគ្នាទៅវិញទៅមក ជាពិសេសគឺរបៀបអ្នកមានទស្សនៈ និងប្រព្រឹត្តចំពោះអ្នកក្រ។
កុំឆាប់មើលងាយមនុស្សដែលមានជីវភាពលំបាកជាងអ្នក ព្រោះពួកគេខំប្រឹងរាល់ថ្ងៃដើម្បីផ្គត់ផ្គង់គ្រួសារ ដើម្បីរស់ក្នុងគ្រាលំបាកក្នុងជីវិត។ អាកប្បកិរិយារបស់ពួកគេចំពោះជីវិតគឺជាអ្វីដែលសមនឹងទទួលបានការគោរព។ នៅពេលដែលមនុស្សម្នាក់ចាប់ផ្តើមមានអំនួត ហើយមើលងាយអ្នកក្រ គាត់បានសាបព្រោះគ្រាប់ពូជអវិជ្ជមានសម្រាប់អនាគតគ្រួសាររបស់គាត់។
តើអ្នកដឹងទេថាអាកប្បកិរិយារបស់ឪពុកម្តាយចំពោះជីវិតនឹងប៉ះពាល់ដោយផ្ទាល់ដល់របៀបដែលកូនរបស់ពួកគេយល់ឃើញអំពីពិភពលោកនេះ? ប្រសិនបើកូនធំឡើងក្នុងបរិយាកាសល្អ ដោយមានឪពុកម្តាយដែលមានជីវិតល្អ មានចិត្តល្អ និងមេត្តាធម៌ នោះទស្សនៈពិភពលោករបស់ពួកគេនឹងល្អខ្លាំងណាស់ ហើយពួកគេនឹងក្លាយជាមនុស្សដែលមានសីលធម៌យ៉ាងងាយស្រួល។ ផ្ទុយទៅវិញ ប្រសិនបើពួកគេធំឡើងក្នុងគ្រួសារដែលមានការមើលងាយអ្នកដទៃ នោះវានឹងពិបាកក្នុងការកសាងសេចក្តីសប្បុរស ការយល់ចិត្ត និងការគោរពចំពោះតម្លៃសីលធម៌ជាមូលដ្ឋាន។ ហើយនៅក្នុងសង្គមដែលឱ្យតម្លៃមនុស្សកាន់តែខ្លាំងឡើងលើទ្រព្យសម្បត្ដិ កង្វះសីលធម៌អាចទុកឱ្យកូនៗរបស់អ្នកឯកោ ខកចិត្ត ឬ បាត់បង់។
២.ការរស់នៅដោយមិនស្មោះត្រង់៖ អ្នកត្រូវដឹងថាគ្មានអ្វីនៅក្នុងជីវិតនេះអមតៈជានិរន្តរ៍នោះទេ។ ជីវិតតែងតែមានការផ្លាស់ប្តូរជានិច្ច យើងម្នាក់ៗគឺមានជីវិតមួយដូចគ្នា ហេតុនេះហាមកេងប្រវ័ញ្ច ឬ ក្បត់អ្នកដទៃ ព្រោះកម្មពារវានឹងបកមករកអ្នក និងកូនៗនៅថ្ងៃមុខ។ ដូច្នេះ មិនថាអ្នកជោគជ័យ ឬ ពូកែខ្លាំងប៉ុណ្ណានោះទេ អ្នកគួរតែរស់នៅដោយសមហេតុផល ហើយចងចាំជានិច្ចថាធ្វើជាមនុស្សត្រូវមានភាពស្មោះត្រង់ក្នុងខ្លួន។ កុំបៀតបៀនអ្នកទន់ខ្សោយ ជ្រើសរើសរស់នៅដោយសប្បុរស យុត្តិធម៌ និងការគោរព។
ប្រសិនបើអ្នករស់នៅដោយទៀងត្រង់ រក្សាកិត្តិយស និងសេចក្តីថ្លៃថ្នូរ នោះអ្នកនឹងបានសុខស្រួលជានិច្ច ហើយថែមទាំងបង្កើតមូលដ្ឋានគ្រឹះដ៏រឹងមាំសម្រាប់កូនចៅជំនាន់ក្រោយផងដែរ។ គ្រួសារដែលមានប្រពៃណីនៃចិត្តល្អនឹងត្រូវបានគេគោរព និងជួយពីអ្នកដទៃពេលមានបញ្ហា។ ការរស់នៅដោយស្មោះត្រង់គឺជាការកសាងអនាគតប្រកបដោយចីរភាពសម្រាប់មនុស្សជំនាន់ក្រោយ។
៣.បរិយាកាសគ្រួសារអាប់អួរ៖ ផ្ទះគឺជាកន្លែងដែលបុគ្គលិកលក្ខណៈរបស់កុមារត្រូវបានបង្កើតឡើង កន្លែងរស់នៅមានឥទ្ធិពលយ៉ាងខ្លាំងទៅលើព្រលឹងរបស់កុមារ វានឹងកំណត់ពីរបៀបដែលកុមារធំឡើង។ ប្រសិនបើកូនធំឡើងក្នុងគ្រួសារដែលមានភាពសុខដុមរមនា ដែលឪពុកម្តាយស្រលាញ់គ្នា និងប្រព្រឹត្តិធម៌ នោះពួកគេក៏នឹងក្លាយជាមនុស្សដែលមានចិត្តល្អ សប្បុរស ចេះអាណិតអាសូរ។ ផ្ទុយទៅវិញ ប្រសិនបើតែងតែមានការឈ្លោះប្រកែកគ្នា ជម្លោះ និងការជេរស្តីច្រើនជាងសើចនៅក្នុងផ្ទះ នោះកុមារនឹងក្លាយទៅជាមនុស្សមិនល្អបណ្តើរៗ មានចរិតឆេវឆាវ និងមានលក្ខណៈខុសឆ្គង។
ដូច្នេះត្រូវចាំជានិច្ចថា ក្នុងនាមជាឪពុកម្តាយ ទំនួលខុសត្រូវរបស់អ្នកមិនត្រឹមតែចិញ្ចឹមកូនរបស់អ្នកប៉ុណ្ណោះទេ តែថែមទាំងបង្កើតអារម្មណ៍ និងបណ្តុះសីលធម៌របស់ពួកគេទៀតផង។ ផ្ទះដ៏កក់ក្តៅគឺជាអំណោយដ៏មានតម្លៃបំផុតដែលអ្នកអាចផ្តល់ឱ្យកូនរបស់អ្នក។ ភាពសុខដុមរមនាក្នុងគ្រួសារគឺជាឱសថខាងវិញ្ញាណដែលចិញ្ចឹមបីបាច់បុគ្គលិកលក្ខណៈរបស់កុមារប្រកបដោយនិរន្តរភាព៕
