ស្ត្រីត្រូវតែជៀសវាងរៀបការជាមួយបុរស ៥ ប្រភេទនេះ បើមិនចង់ទឹកភ្នែករាល់ថ្ងៃ

គេតែងតែនិយាយថា បុរសខ្លាចជ្រើសរើសអាជីពខុស ចំណែកស្ត្រីខ្លាចរៀបការជាមួយបុរសខុស។ សម្រាប់ស្ត្រី ការរៀបការជាមួយបុរសខុស អាចមានឥទ្ធិពលយ៉ាងខ្លាំងដល់ជីវិតរបស់ពួកគេ។ ដូច្នេះហើយ នារីៗដែលមិនទាន់រៀបការ ពេលគិតដល់រឿងរៀបការ គួរតែប្រយ័ត្នមើលថា បុរសនោះពិតជាសាកសមនឹងអ្នកមែនឬ? ជាពិសេសជាមួយបុរស ៥ប្រភេទខាងក្រោមនេះ៖

១.ទម្លាប់គេចវេស៖ មានប្រភេទបុរសដែលមានបុគ្គលិកលក្ខណៈគេចវេស ពេលប្រឈមមុខនឹងបញ្ហា ជំនួសឱ្យការប្រឈមមុខនឹងវា ហើយស្វែងរកដំណោះស្រាយ គាត់តែងតែជៀសវាងវា ហើយមិនអើពើនឹងអារម្មណ៍របស់ដៃគូគាត់ទាំងស្រុង។ បើត្រូវរស់នៅជាមួយមនុស្សប្រុសបែបនេះ ជីវិតអ្នកនឹងវេទនា។ នៅពេលដែលអ្នកទាំងពីរមិនអាចប្រាស្រ័យទាក់ទងគ្នាប្រកបដោយប្រសិទ្ធភាពក្នុងអាពាហ៍ពិពាហ៍ អ្នកនឹងត្រូវស៊ូទ្រាំនឹងការលំបាកទាំងអស់ដោយខ្លួនឯង។
ជាងនេះទៅទៀត បុរសដែលធ្លាប់ប្រើ “ហឹង្សាត្រជាក់” ប្រហែលជាមិនស្រលាញ់អ្នកខ្លាំងទេ ដូច្នេះគាត់គ្រាន់តែឈរមើលអ្នករងទុក្ខដោយមិនធ្វើអ្វីសោះ។ មនុស្សស្រី បើមិនអាចរកបុរសដែលយល់ចិត្ត និងឱ្យតម្លៃអ្នកបានទេ ចូររៀនស្រឡាញ់ខ្លួនឯង ហើយកុំខ្ជះខ្ជាយពេលវេលាជាមួយបុរសបែបនេះ។

២.កង្វះការយល់ចិត្ត៖ បុរសអាត្មានិយម តែងតែគិតតែពីអារម្មណ៍ និងផលប្រយោជន៍ផ្ទាល់ខ្លួន ដោយមិនខ្វល់ពីអារម្មណ៍អ្នកដទៃ។ បុរសបែបនេះខ្វះការយល់ចិត្តទាំងស្រុង ហើយនោះជាសញ្ញានៃទំនាក់ទំនងមិនល្អ។ បើអ្នករៀបការជាមួយមនុស្សប្រភេទនេះ ជីវិតរបស់អ្នកនឹងពិបាក ព្រោះមនុស្សប្រុសគេនឹងមិនផ្លាស់ប្តូរទៅជាមនុស្សល្អក្រោយការរៀបការដូចដែលអ្នកគិតនោះទេ។
៣.បញ្ញាអារម្មណ៍ទាប (EQ)៖ បុរសដែលមានបញ្ញាផ្លូវអារម្មណ៍ទាបនឹងមិនផ្តល់តម្លៃអារម្មណ៍វិជ្ជមានដល់អ្នកឡើយ។ មិនថាអ្នកធ្វើអ្វី ឬ និយាយអ្វីទេ គាត់តែងតែបដិសេធអ្នក ហើយធ្វើឱ្យអ្នកឈឺចាប់។ ខ្ញុំបានជួបបងស្រីម្នាក់ដែលបានចែករំលែកថាប្តីរបស់នាងធ្វើឱ្យនាងវេទនាយ៉ាងខ្លាំងក្នុងអាពាហ៍ពិពាហ៍ដោយសារតែគាត់មិនដែលយល់និងអាណិតនាងទេតែងតែបន្ទោសនាងចំពោះអារម្មណ៍អវិជ្ជមានរបស់គាត់។
បុរសល្អពិតប្រាកដម្នាក់នឹងដឹងពីរបៀបទទួលស្គាល់បញ្ហាផ្ទាល់ខ្លួនរបស់គាត់ ហើយតែងតែគិតអំពីអារម្មណ៍របស់ដៃគូរបស់គាត់ ជាជាងគ្រាន់តែបន្ទោសដៃគូ។ ខ្ញុំសង្ឃឹមថាស្ត្រីទាំងអស់នឹងជួបបុរសម្នាក់ដែលចេះចែករំលែក និងយល់ ជំនួសឱ្យការបន្តធ្លាក់ចូលទៅក្នុងទំនាក់ទំនងដ៏យ៉ាប់យឺនបែបនេះ។

៤.មិនចេះឲ្យតម្លៃ៖ ដើម្បីឱ្យគូស្នេហ៍មានសុភមង្គលក្នុងរយៈពេលវែងត្រូវចេះដឹងគុណ និងយកចិត្តទុកដាក់ចំពោះគ្នាទៅវិញទៅមក ។ ប៉ុន្តែបុរសជាច្រើនខ្វះការដឹងគុណ ទោះអ្នកលះបង់ប៉ុណ្ណាក៏គាត់មិនដែលកត់សម្គាល់ដែរ។ ជាមួយបុរសបែបនេះ យកល្អគួរតែនៅឲ្យឆ្ងាយ និងកុំទាក់ទងជាមួយគេអោយសោះ។
ជារឿយៗយើងឃើញស្ត្រីលះបង់ខ្លួនឯងដើម្បីគ្រួសារ បោះបង់អាជីព និងការងារដើម្បីមើលថែប្តី និងកូន ប៉ុន្តែលទ្ធផលគឺមានការត្អូញត្អែរថា ពួកគេមិនបានរួមចំណែកគ្រប់គ្រាន់សម្រាប់គ្រួសារ ឬ សូម្បីតែឮឃ្លាថា “ដេកស៊ីលុយប្តី” ។ នៅឱ្យឆ្ងាយពីមនុស្សប្រុសដែលមិនពេញចិត្តអ្នក ពួកគេមិនសមនឹងការបារម្ភ ឬ ទុក្ខព្រួយរបស់អ្នកទេ។

៥.គ្មានអារម្មណ៍នៃព្រំដែន៖ ប្រភេទបុរសដែលគ្មានព្រំដែនគឺពួកគេមិនយល់ពីភាពខុសគ្នារវាងក្រុមគ្រួសារនិងអ្នកក្រៅឡើយ។ ជាឧទាហរណ៍ បុរសខ្លះគិតថា ពេលប្រពន្ធរៀបការ ត្រូវតែទទួលយកគ្រួសារ ត្រូវតែស្តាប់បង្គាប់ឪពុកម្តាយ ហើយតែងតែដាក់គ្រួសារគេជាអាទិភាព។ ក្រៅពីនេះ បុរសមួយចំនួនខ្វះអារម្មណ៍នៃព្រំដែនក្នុងទំនាក់ទំនងជាមួយស្រីផ្សេង។ ទោះបីជាអាកប្បកិរិយានេះហាក់ដូចជាធម្មតាក៏ដោយ វាពិតជាគ្រោះថ្នាក់ខ្លាំងណាស់ ហើយអាចបណ្តាលឱ្យមានរបួសដល់ស្ត្រីបានយ៉ាងងាយ។ បុរសបែបនេះមិនអាចនាំសុភមង្គលដល់អ្នកបានទេ។
ដូច្នេះប្រសិនបើគូស្នេហ៍ ឬ ស្វាមីរបស់អ្នកមិនគោរពព្រំដែនផ្ទាល់ខ្លួនទេ ចូរសម្រេចចិត្តចាកចេញពីគាត់។ វាជាវិធីល្អបំផុតដើម្បីការពារខ្លួនអ្នក និងរក្សាជីវិតរបស់អ្នកឱ្យរីករាយ។ រក្សាភាពរឹងមាំ និងផ្លូវចិត្តរបស់អ្នកអោយបានល្អ ព្រោះស្ត្រីសមនឹងទទួលបានការស្រឡាញ់ និងគោរព មិនមែនព្យាយាមសុំវាពីមនុស្សប្រុសនោះទេ៕