មិនថាជីវិតនេះជូរចត់ និងលំបាកយ៉ាងណាក៏ដោយ ខ្ញុំសង្ឃឹមថាអ្នកនឹងបើកចំហរ និងស្ងប់ស្ងាត់ជានិច្ចដើម្បីប្រឈមមុខនឹងវា។ ជីវិតគឺលំបាក ប៉ុន្តែមានរសជាតិជូរចត់៥យ៉ាងក្នុងជីវិត ប្រសិនបើអ្នកអាចគ្រប់គ្រងវាបាន អ្នកប្រាកដជាមានអនាគតភ្លឺស្វាង។
១.ខ្វះលុយ៖ ដល់វ័យកណ្តាល បើអ្នកនៅតែក្រ ការថែរក្សាឪពុកម្តាយចាស់ជរា ការផ្តល់ការអប់រំដល់កូនៗ និងការរស់រានមានជីវិតក៏ពិបាកដែរ។ ព្រោះជុំវិញខ្លួនយើង គ្មានអ្វីប្លែកពីលុយនោះទេ។ ដូច្នេះ ទោះរកលុយលំបាកប៉ុណ្ណាក៏ដោយ អ្នកគួរតែព្យាយាមឲ្យអស់ពីសមត្ថភាព ព្រោះនៅពេលដែលអ្នកមានលុយក្នុងដៃ នោះអ្នកនឹងមានជីវិតមានស្ថិរភាព និងសប្បាយរីករាយជាងពេលមុនទៅទៀត។
២.ជំងឺ៖ មានតែពេលឈឺទេ ទើបមនុស្សយល់ច្បាស់ពីតម្លៃនៃរាងកាយដែលមានសុខភាពល្អ។ សុខភាពគឺជាដើមទុន ប៉ុន្តែយើងតែងតែចាប់អារម្មណ៍នឹងការល្បួងពីខាងក្រៅ ហើយមិនអើពើនឹងវា។ នៅពេលដែលជំងឺកើតឡើង អ្នកនឹងស្ដាយដែលត្រូវគេងតែនៅក្នុងមន្ទីរពេទ្យ។ សុភមង្គលពិតគឺនៅពេលដែលរាងកាយគ្មានជំងឺ ហើយចិត្តក៏ស្ងប់។ ដូច្នេះហើយត្រូវព្យាយាមថែរក្សាសុខភាពឲ្យបានល្អ។ ទោះបីជាអ្នករស់នៅម្នាក់ឯងក៏ដោយ អ្នកត្រូវតែមានសុខភាពល្អ និងសប្បាយរីករាយ។
៣.គ្រួសារគ្មានភាពកក់ក្តៅ៖ មនុស្សនិយាយថា «ផ្ទះគឺជាកន្លែងដែលនាំមកនូវភាពកក់ក្ដៅ»។ ប៉ុន្តែសម្រាប់មនុស្សមួយចំនួន ផ្ទះគឺជានរកដែលនាំឱ្យពួកគេរងទុក្ខ។ បរិយាកាសគ្រួសារគឺជាអ្វីដែលនឹងកំណត់ដោយផ្ទាល់នូវកម្រិតនៃសុភមង្គលរបស់សមាជិកគ្រួសារនីមួយៗ។ ប្រសិនបើទំនាក់ទំនងគ្រួសារបែកបាក់ ហើយគ្រួសារទាំងមូលខ្វះស្មារតីសាមគ្គីភាព នោះផ្ទះនោះប្រាកដជាមិនមានសន្តិភាពឡើយ។ សង្ឃឹមថា យើងម្នាក់ៗអាចគ្រប់គ្រងធម្មជាតិរបស់យើង បណ្ដុះសេចក្ដីស្រឡាញ់ដល់គ្រួសារយើង និងរៀនយល់ចិត្តគ្នាទៅវិញទៅមក។
៤.ការទាមទារដោយបង្ខំ៖ ចូរយើងរៀនមើលឱ្យកាន់តែច្បាស់នៅគ្រប់បញ្ហាទាំងអស់ ព្រោះវាមិនអាចទៅរួចទេសម្រាប់អ្វីៗគ្រប់យ៉ាងដើម្បីដើរតាមចិត្តរបស់យើងចង់បាន។ អ្វីដែលយើងត្រូវធ្វើគឺមើលថែខ្លួនឯងឲ្យបានល្អ ខំប្រឹងធ្វើការកុំឲ្យស្តាយក្រោយ។ កុំបាច់ស្តាយអ្នកដែលបានចាកចេញ ហើយក៏មិនចាំបាច់សោកស្តាយចំពោះអតីតកាលដែរ ត្រូវរស់នៅសម្រាប់បច្ចុប្បន្ន ហើយរង់ចាំអនាគតដ៏ល្អសម្រាប់តែអ្នក!
៥.លះបង់៖ សុភមង្គលកើតចេញពីអារម្មណ៍របស់មនុស្សម្នាក់ៗ បើយើងចេះគ្រប់គ្រងវា យើងនឹងមានអារម្មណ៍សប្បាយចិត្តជាក់ជាមិនខាន។ ជីវិតគឺជារបស់អ្នក អ្នកជាអ្នកសម្រេចចិត្តថាតើវាល្អឬអាក្រក់។ អតីតកាលបានកន្លងផុតទៅហើយ ដូច្នេះយើងគួរតែទុកបំភ្លេចវាចោលទៅ អ្នកណាស្រលាញ់ ឬ ស្អប់គឺអាស្រ័យគេ សំខាន់យើងត្រូវរស់នៅដោយមានសុភមង្គល។ របស់មួយបើយើងអាចយកវាបាន យើងក៏ត្រូវតែចេះដាក់ចុះ ត្រូវក្លាហាន និងទទួលយកការលះបង់ កុំបង្ខំខ្លួនឯងឱ្យរស់នៅក្នុងភាពសោកសៅជារៀងរហូត៕
