ឪពុកម្នាក់បានផ្ដាំទៅកូនប្រុសសំណព្វចិត្តថា ក្នុងនាមកូនជាកូនប្រុស បើកូនចង់ឱ្យជីវិតកូនបានល្អប្រសើរ ចង់ឱ្យជីវិតកូនបានរុងរឿង មានក្ដីសុខ សុភមង្គលទៅថ្ងៃមុខ កូនត្រូវតែរកប្រពន្ធល្អឱ្យបានបី នោះជីវិតកូន មិនថាធ្វើការ ឬប្រកបកិច្ចការងារអ្វីទេ កូនប្រាកដជាជោគជ័យ ព្រោះកូនមានប្រពន្ធទាំងបីនៅចាំជ្រោមជ្រែង និងរួមដំណើរជាមួយកូនរហូតទៅ។
តើប្រពន្ធបីនោះ មានន័យថាយ៉ាងម៉េច? ត្រូវឱ្យប្រពន្ធមករស់នៅជាមួយគ្នា ទាំងឈឺចាប់ឈឺចិត្ត ស្នេហាត្រីកោណ ចតុកោណហ្នឹងមែនទេ? មិនមែនទេ ពាក្យថា ប្រពន្ធបី ពុំបានសំដៅដល់ ប្រពន្ធដែលជាមនុស្សស្រីបីនាក់នោះឡើយ តែពាក្យថា ប្រពន្ធបីនេះ គេចង់សំដៅដល់ ៖
១. ប្រពន្ធទីមួយគឺ ចំណេះដឹង
ក្នុងនាមជាមនុស្សប្រុស ជាកូនប្រុស អនាគតជាស្វាមី ជាឪពុក ជាអ្នកទំនុកបម្រុងក្នុងគ្រួសារ ចំណេះដឹង គឺជារឿងដែលចាំបាច់បំផុត ព្រោះអ្នក ជាអ្នកដែលត្រូវរ៉ាប់រង ក្នុងជីវិតគ្រួសារទាំងមូល បើអ្នកមិនមានចំណេះដឹង អ្នកក៏មិនអាចផ្ដល់ភាពស្រណុកសុខស្រួល ផ្ដល់ភាពទឺពឹងរឹងមាំ ដើម្បីដឹកនាំគ្រួសារអ្នកបានដែរ។ ចំណេះដឹង គឺជាស្ពាន ដើម្បីចម្លងអ្នកឱ្យមានជីវីតគាប់ប្រសើរ មិនលំបាកវេទនា នៅក្នុងជីវិត។
២. ប្រពន្ធទីពីរគឺ ការងារមួយដ៏ល្អ
ជាការពិតណាស់ មានការងារ មានមុខរបរ ទើបមានចំណូលសម្រាប់ទ្រទ្រងក្នុងជីវិត មិនថាអ្នកនៅម្នាក់ឯង ឬអ្នកមានគ្រួសារទេ អ្នកត្រូវតែមានការងារមួយឱ្យនឹងធឹង ទើបអ្នកមិនបាច់ត្រូវខ្វល់ចិត្ត គិតច្រើនថាអ្នក នឹងខ្វះខាតលុយកាក់។ ជាចាំបាច់ ការងារ ការលើកមុខមាត់ ការលើកកិត្តិយសសម្រាប់អ្នក និងក្រុមគ្រួសារអ្នកដែរ បើអ្នកគ្មានការងារ អ្នកក៏នឹងគ្មានប្រាក់ចំណូល បើអ្នកគ្មានប្រាក់ចំណូលអ្នកនឹងក្រ បើអ្នកក្រ គេនឹងមើលងាយអ្នក កុំថាអ្នកដទៃ សូម្បីបងប្អូនអ្នក ក៏មើលងាយអ្នកថា គ្មានកំណើតដែរ។
៣. ប្រពន្ធទីបីគឺ ឧត្តមភរិយា
អ្នកណាៗក៏ត្រូវតែមានគូ ហើយគ្រប់គ្នាប្រាកដជាចង់បានគូជីវិតដែលល្អហើយ ដូច្នេះ ក្នុងនាមជាកូនប្រុស អ្នកត្រូវរកប្រពន្ធទីមួយ ប្រពន្ធទីពិរជាមុនសិន ទើបអ្នកអាចរកប្រពន្ធទីបីនេះបានល្អ តែបើអ្នកគ្មានទីមួយ គ្មានទីពីរ អ្នកក៏មិនគួរមានប្រពន្ធទីបីដែរ ព្រោះអ្នកនឹងកាន់តែលំបាក ដុនដាបក្នុងជីវិត។ ការយកប្រពន្ធទីបីនេះ មិនមែនជារឿងងាយឡើយ ហើយបើអ្នកអាចរកបានប្រពន្ធទីបីនេះ ជាឧត្តមភរិយាពិតប្រាកដហើយ នោះជីវិតអ្នកនឹងកាន់តែរីកលូតលាស់ ដុះដាល ភ្លឺត្រចេះត្រចង់។
អត្ថបទ ៖ ភី អេក / រក្សាសិទ្ធ : Knongsrok