ក្រុមហ៊ុនNike គឺជាក្រុមហ៊ុនដែលលក់ផលិតផលដាច់ខ្លាំង ហើយរកបានចំណូលច្រើន ក្នុងចំណោមក្រុមហ៊ុនBrand ដទៃទៀត។ តែនៅក្នុងនោះក៏មានផលិតករជាច្រើន ដែលតែងតែព្យាយាមផលិតសម្ភារៈឱ្យស្រដៀងទៅនឹងផលិតផលដើមរបស់ក្រុមហ៊ុនNike។
ពេលខ្លះវាងាយស្រួលក្នុងការកំណត់ចំណាំថាផលិតផលណាជារបស់ពិតឬក្លែងក្លាយ ក៏ប៉ុន្តែដោយហេតុតែផលិតករផ្សេងៗទៀតកាន់តែមានជំនាញក្នុងការក្លែងបន្លំផលិតផល នោះយើងអាចពិបាកក្នុងការកំណត់ថា តើវាជាផលិតផលពិតប្រាកដ ឬជាផលិតផលក្លែងក្លាយ។
ដូច្នេះនេះជារបៀបដែលយើងអាចវិនិច្ឆ័យពីភាពខុសគ្នារវាងស្បែកជើងNikeពិត និងក្លែងក្លាយ៖
១. ការមើលជាក់ស្តែងទៅលើសាច់ក្រណាត់ ឬសាច់របស់ស្បែកជើង
ជាបឋម យើងអាចពិនិត្យទៅលើថ្នេរនៃស្បែកជើងនោះ។ បើសិនជាមានថ្នេរវាច ដេរមិនស្អាត ឬផុយនោះវាជារបស់ក្លែងបន្លំ ព្រោះក្រុមហ៊ុន Nike ផលិតស្បែកជើងដោយគោរពតាមស្តង់ដាខ្ពស់។ យើងក៏អាចស្ទាបទៅលើសាច់ស្បែកជើងជាក់ស្តែងបានដែរ។ បើសិនជាសាច់នោះទន់ ងាយស្រួលបត់បែន នោះវាជាស្បែកជើងពិតពីក្រុមហ៊ុន តែបើសិនជាសាច់របស់វារឹង ឬពិបាកក្នុងការបត់បែន នោះបានន័យថាវាជាផលិតផលក្លែងក្លាយហើយ។
២. ការពិនិត្យលេខកូដ SKU
លេខកូដ SKU នេះជាលេខកូដដែលក្រុមហ៊ុនប្រើប្រាស់ដើម្បីតាមដានស្បែកជើងរបស់ខ្លួន។ លេខកូដនេះគឺមាននៅពីក្រោមអណ្តាតស្បែកជើង។ បើលេខកូដនេះផ្ទៀងផ្ទាត់ជាមួយលេខកូដប្រអប់ នោះវាជារបស់ពិត។ តែទោះបីជាអ្នកលក់នោះអាចនិយាយថាច្រឡំប្រអប់ក៏ដោយ ក៏ស្បែកជើងរបស់អ្នកអាចមានភាគរយច្រើនដែលអាចជារបស់ក្លែងក្លាយដែរ។
៣. បត់បាតស្បែកជើង
បើអ្នកបត់បាតស្បែកជើងពិតរបស់Nike អ្នកនឹងឃើញថាស្បែកជើងនោះងាយនឹងត្រឡប់មកទម្រង់ដើមវិញក្នុងរយៈពេលខ្លីបំផុត ព្រោះវាធ្វើមកពីសម្ភារៈប្រភេទ Phylon ដែលទន់ ស្រាល ងាយស្រួលបត់បែន ហើយងាយនឹងត្រឡប់មកទម្រង់ដើមវិញបាន។ តែបើវាមិនត្រឡប់មកសភាពដើមវិញភ្លាមៗក្រោយពេលបត់រួចទេ នោះវាជាស្បែកជើងក្លែងក្លាយ ដែលភាគច្រើនធ្វើមកពីកៅស៊ូ BRS-1000។
៤. ការពិនិត្យមើលផ្លាកក្រោមអណ្តាតស្បែកជើង
ស្បែកជើងNike ពិតប្រាកដតែងតែមានផ្លាកដេរភ្ជាប់ជាមួយបាតស្បែកជើង ហើយភាគច្រើនមានសរសេរ website ពិតរបស់Nike គឺ “nikebetterworld.com” ជាពណ៌ស លើផ្ទាំងពណ៌ខ្មៅតូចមួយ។ តែបើផ្លាកនោះមិនដេរភ្ជាប់ ឬសរសេរត្រឹម Made in China នោះវាជារបស់ក្លែងក្លាយហើយ។
៥. ចំពោះការកុម្ម៉ង់ Online
ចំពោះការកុម្ម៉ង់ Online យើងមិនអាចដឹងទេថាសាច់ ឬគុណភាពរបស់វាយ៉ាងណានោះទេ។ ប៉ុន្តែយើងគួរតែបញ្ជាក់ថាវាមានប្រអប់ត្រឹមត្រូវ ព្រមទាំងតម្លៃដែលសាកសមទៅនឹងស្បែកជើងនោះ។ យើងក៏អាចពិនិត្យរូបថតនោះបញ្ចាក់ថាវាមិនមែនជារូបដែលដកស្រង់ចេញពីអុីនធើណេត៕
ប្រភព៖ បរទេស