ផ្ទលំហែដ៏ស្រស់ស្អាត នៅចន្លោះធម្មជាតិ ក្បែរមាត់ទឹក និងមានទេសភាពដ៏អស្ចារ្យ សាកសមសម្រាប់អ្នកដែលស្រឡាញ់ធម្មជាតិ ឬចង់សាងសង់ផ្ទះនៅតំបន់សួនច្បារស្ងាត់ សម្រាប់វិស្សមកាល ឬពេលទំនេរពីការងារ ។ ដោយថ្ងៃនេះយើងនឹងលើកឡើងពីផ្ទះលំហែមួយខ្នងដ៏ស្រស់ស្អាតមួយកន្លែង។
ផ្ទះដ៏ស្រស់ស្អាតនេះ ជាផ្ទះឈើតូចមានកម្ពស់ពីរជាន់ ដែលមានដំបូលប្រក់ក្បឿង និងមានគ្រោងជាដែក ។ ជាពិសេសមានរាបហាលនៅខាងក្រៅមានផ្ទៃដីរាបស្មើរធំទូលាយ សម្រាប់អង្គុយមើលទេសភាពដ៏ស្រស់ស្អាតដែលព័ទ្ធជុំវិញផ្ទះ ហើយវាក៏ជាកន្លែងសម្រាប់ទទួលទានតែ ឬកាហ្វេ និងអាចជជែកជាមួយមិត្តភក្តិ ឬក្រុមគ្រួសារ។ ហើយនៅខាងក្រោយ មានផ្ទះបាយតូចមួយគួរឱ្យស្រឡាញ់ផងដែរ។
ផ្ទះនេះត្រូវបានគេសាងសង់ជួបប្របមាត់ទឹក ដែលមានបរិយាកាសស្រស់ថ្លា និងត្រជាក់ល្អទាំងយប់ទាំងថ្ងៃ ពេលទំនេរអាចចុះហែលទឹកលេង ពិសេសបំផុតគឺ នៅជុំវិញផ្ទះគ្មានម៉ាស៊ីនត្រជាក់ គ្មានទូរទស្សន៍ គ្មានទូទឹកកកទេ ប៉ុន្តែអាកាសធាតុល្អគួរឱ្យចង់រស់នៅជាមួយនឹងសម្រស់បែបធម្មជាតិទេសភាព ៣៦០ ដឺក្រេជុំវិញផ្ទះ។
ទីតាំងសំខាន់ៗនៃផ្ទះលំហែរមួយនេះមានដូចជា ៖
– ខាងក្រៅរានហាលទូលាយអង្គុយមើលទឹក ផឹកតែ ឬកាហ្វេ និងអាចចុះងូតទឹកបាន
-ជ្រុងនៅខាងក្រោយ មានផ្ទះបាយតូច មានឧបករណ៍ចម្អិនអាហារពេញលេញ ជាមួយបញ្ជរបារសម្រាប់អង្គុយញ៉ាំអាហារ ហើយផ្ទះបាយឈើគឺទូលាយងាយស្រួលចម្អិន។
-ជាន់ទី ២ គឺជាបន្ទប់គេង។ ការរចនាគឺសាមញ្ញដោយប្រើឈើទាំងគ្រែ ទូខោអាវ និងបន្ទប់គេង ដោយមានតុបតែងជាមួយវាំងននពណ៌ស
-បន្ទប់ទទួលភ្ញៀវនៅជាន់ផ្ទាល់ដី កម្រាលឈើរលោង សាឡុងបែបបុរាណ ទ្វារកញ្ចក់រអិល ជាមួយនឹងវាំងននពណ៌សដែលមានផាសុកភាព
-ជ្រុងមួយទៀតនៃបន្ទប់ទទួលភ្ញៀវមើលពីលើជណ្តើរដែលនាំទៅដល់ជាន់ទី ២ ជ្រុងនេះអាចមើលឃើញទិដ្ឋភាពខាងក្រៅផ្ទះផងដែរ។
-បន្ទប់ទឹកត្រូវបានរចនាឡើងយ៉ាងសាមញ្ញដោយផ្តោតលើមុខងារសាមញ្ញ តែមានម៉ាស៊ីនទឹកក្តៅ សម្រាប់អាកាសធាតុត្រជាក់នៅក្នុងព្រៃភ្នំធម្មជាតិបែបនេះ។
ដូច្នេះប្រសិនជាលោកអ្នកមានដីចំការ ឬដីនៅក្បែរជើងភ្នំអាចច្នៃសាងសង់ម៉ូតផ្ទះរបៀបនេះបានពិតជាស្រស់ស្រាយខ្លាំង។ តែយ៉ាងណាមិញ ការពិតផ្ទះនេះ គឺជាផ្ទះលំហែដែមានទីតាំងនៅក្នុងខេត្តកាណានបុរី ប្រទេសថៃ ដោយតម្លៃនៃការស្នាក់នៅផ្ទះឈើមួយនេះ មានតម្លៃ ១.៥០០ បាត ឬប្រមាណជា ៤៤ដុល្លាត អាចគេងបាន ២ នាក់ អាចបន្ថែមមនុស្ស ២ នាក់បន្ថែម ៥០០ បាតក្នុងមនុស្សម្នាក់ មានខ្ទមតូច ២ តូច ៨០០ បាតអាចគេងបាន ២ នាក់ ៕
ប្រភពរូបភាព៖ ฌอโคว at หม่องกะลา
