នៅខាងក្នុងផ្ទះ ដែលជាកន្លែងយើងរស់នៅប្រចាំថ្ងៃ គឺជាកន្លែងដែលផ្តុំទ្រព្យ ផ្តុំសំណាង ដូច្នេះបើយើងរៀបចំមិនបានល្អ នោះវានឹងក្លាយជាសំណាងអាក្រក់ ឬធ្វើឲ្យខ្សោយទ្រព្យចេញទៅក្រៅវិញ។ បើចង់លើកយីអ៊ុនក្នុងផ្ទះ ចូរម្ចាស់ផ្ទះទាំងឡាយអនុវត្តនៅទម្លាប់ទាំង ៥ ខាងក្រោម៖
៥) រក្សាទុកលុយនៅទិសអាគ្នេយ៍
គ្រួសារជាច្រើនក៏នៅតែមានតម្កល់លុយមួយចំនួននៅក្នុងផ្ទះដែរ បើទោះបីសម័យកាលទំនើបនេះ គេមានធនាគារដើម្បីរក្សាទុកដោយមានសុវត្ថិភាពក៏ដោយ។ យ៉ាងណាការរក្សាទុកលុយក្រៅពីជ្រើសរើសទីតាំងសុវត្ថិភាព បញ្ចៀសកណ្តុរ កន្លាត អ្នកក៏ត្រូវមើលទៅលើទិសដែរ។
បើតាមក្បួនហុងស៊ុយ គេឲ្យជ្រើសរើសបែរដុំលុយទៅទិសអាគ្នេយ៍ ព្រោះវាអាចទាញថាមពលវិជ្ជមានចូលមកក្នុងផ្ទះ ហើយជួយឲ្យម្ចាស់ផ្ទះនោះរកប្រាក់ចំណេញបានកាន់តែច្រើនបន្ថែមទៀត ពីលើប្រាក់ចំណូល ប្រាក់ចំណេញដែលមាន។ មិនថាក្រឡុកក្រឡៀត កៀនកោះខាងណាក៏ដោយក្តី ឲ្យតែអ្នកគិតថា រក្សាវាទុកបានហើយ ក៏បង្វែរដុំលុយនោះ មកកាន់ទិសអាគ្នេយ៍មក។
៤) ដាក់ឧបករណ៍ព្យួរសំឡេងខ្យល់នៅខាងមុខទ្វារក្រៅផ្ទះ
នៅខាងមុខទ្វារ ខាងក្រៅផ្ទះ គេណែនាំឲ្យអ្នកព្យួរឧបករណ៍សំឡេងខ្យល់ ដែលវាជាឧបករណ៍បន្លឺសំឡេងថាមពលយ៉ាងអស្ចារ្យ ហើយដូចជាមេដែកឆក់ទ្រព្យ ឆក់សំណាង ចូលមកក្នុងគ្រួសារអ៊ីចឹង។ ប៉ុន្តែរបស់នេះ គេមិនណែនាំឲ្យដាក់ក្នុងបន្ទប់គេងនោះទេ។
ជាការពិត ការព្យួរកណ្តឹងខ្យល់ មិនត្រឹមជាគ្រឿងតុបតែងឲ្យស្រស់ស្អាតក្នុងបរិវេណផ្ទះនោះទេ តែវាក៏ជាគ្រឿងហុងស៊ុយ ហៅសំណាង ហៅលាភចូលផ្ទះ ដែលអាចជួយឲ្យម្ចាស់ផ្ទះកាន់តែឆាប់មានបានលឿន។
៣) កុំទុកធុងអង្ករឲ្យនៅទទេ
ធុងអង្ករក្នុងផ្ទះរបស់អ្នក ក៏មិនត្រូវទុកឲ្យនៅទទេនោះដែរ ពោលគឺត្រូវមានអង្ករពេញធុងរហូត ព្រោះវាតំណាងជាកន្លែងប្រមូលផ្តុំទ្រព្យ ដូច្នេះបើអស់អង្ករពីធុង ក៏ដូចអស់ទ្រព្យពីផ្ទះអ៊ីចឹងដែរ។
ដូចគ្នា អ្នកក៏មិនត្រូវឲ្យធុងអង្ករមានភាពធ្លោះធ្លាយនោះដែរ ព្រោះការណ៍បើធុងអង្ករ ឬពាងអង្ករធ្លុះធ្លាយ គឺជាប្រផ្នូលនៃការរបូតចេញនូវទ្រព្យសម្បត្តិ ឬហូរចេញនូវលាភសំណាង ដូច្នេះយើងមិនគួរទុកឲ្យធុង ឬពាងអង្ករធ្លុះធ្លាយនោះទេ គប្បីត្រូវតែជួសជុល ឬប្តូរចេញឲ្យបានស្អាត។
២) ជួសជុលនិងសម្អាតផ្ទះ
ប្រសិនផ្ទះរបស់អ្នកគ្មានរបៀបរៀបរយ រញ៉េរញ៉ៃ មិនដែលសម្អាតនោះ វាក៏ពិបាកនឹងហៅសំណាងចូលមកក្នុងផ្ទះដែរ។ រាល់ម្ចាស់ផ្ទះទាំងឡាយ គួរតែសម្អាតផ្ទះជាប្រចាំ ហើយរៀបចំមានកន្លែងសម្រាកឲ្យអារម្មណ៍ធូរស្រាល និងផាសុកភាព។ នោះគឺជាកត្តាសំខាន់មួយ ក្នុងការបន្ថែមភាពរុងរឿងដល់ក្រុមគ្រួសារ។
១) គ្រឿងសង្ហារិមនៅក្នុងផ្ទះគួរតែធ្វើពីឈើ
ប្រសិនអ្នកចង់បង្កើនទ្រព្យសម្បត្តិរបស់អ្នក ក៏អ្នកគួរតែបន្ថែមគ្រឿងសង្ហារិមក្នុងផ្ទះ ដែលធ្វើពីឈើ ព្រោះឈើជាសម្ភារៈទាក់ទាញសំណាង ដែលគេជឿរាប់រយឆ្នាំមកហើយ។ ប្រសិនអ្នកមិនមានលទ្ធភាពទិញរបស់ធំដុំអ្វីនោះ ត្រឹមតែរូបភាពព្យួរជញ្ជាំងដែលធ្វើពីឈើក៏បាន។
តែយ៉ាងណា ការអនុវត្តទាំងអស់ដូចរៀបរាប់ សូមធ្វើទៅតាមលទ្ធភាព មិនចាំបាច់តែប្រើប្រាស់របស់ថ្លៃ ឬទំនើបអ្វីនោះទេ ជាក់ស្តែងដូចការប្រើប្រាស់ធាតុឈើ ជាគ្រឿងសង្ហារឹម ក៏ត្រឹមយកឈើ ដែលមានតម្លៃសមល្មម មិនចាំបាច់តែឈើធំៗ ឬឈើហាមឃាត់ ជៀសវាងនាំតែឲ្យប៉ះពាល់ដល់សម្បត្តិធម្មជាតិ៕
ប្រភព៖ បរទេស | ប្រែសម្រួល៖ ក្នុងស្រុក